「食屎陳師奶」為廣告罕有露腿 孫慧蓮受舊患困擾上落樓梯都痛

唔少人都知劉鑾雄係處境劇《愛‧回家之開心速遞》鐵粉，佢喺訪問中仲隨口可以嗌出劇中嘅角色「食屎陳師奶」，可見劇集同角色都相當深入民心。
孫慧蓮喺劇中飾演「食屎陳師奶」。
不過飾演「食屎陳師奶」嘅孫慧蓮最近就受右腳膝頭舊患困擾，以前曾任教師嘅佢，由於工作太忙所以無點理會舊患，點知年紀漸長，舊患就不時會疼痛，有時喺劇中要上落樓梯借豉油，都會令佢招架不住，孫慧蓮表示：「舊患成日都扯住痛，上落樓梯都會卡卡聲，平時拍戲上樓梯嘅戲份，NG多幾次都會痛，真係有心無力。而且當年教書時候成日都企，搞到我長期腰酸背痛，已經困擾咗十幾年。」
孫慧蓮接受醫療中心治療舊患。孫慧蓮受舊患困擾。
早前孫慧蓮就受醫療中心邀請拍攝一輯廣告，原來孫慧蓮係該醫療中心嘅用家，佢經脊醫及物理治療師診症後，做咗三次療程就已經紓緩到困擾多年嘅腰痛同舊患，所以今次對方邀請拍攝廣告，孫慧蓮亦爽快答應。
腳上舊患令孫慧蓮上落樓梯都會痛。
廣告中孫慧蓮大方公開自己接受治療嘅片段，當中更激罕露背又露腿。對於今次拍攝，孫慧蓮表示係寓工作於娛樂，邊享受療程邊拍廣告，最重要嘅係佢喺療程後條腰可以慢慢向下彎，而手腳同關節都變得更靈活：「拍起劇上嚟都容易得多，《愛回家》拍幾多集都冇問題啦！講真，我呢個年紀，最緊要就係行得、走得、食得，而家真係輕鬆晒！」
廣告中孫慧蓮大方公開自己接受治療嘅片段。