張敬軒澳門尾場門票炒至七千 於音樂啟蒙老師陳慧嫻前獻唱感緊張

張敬軒喺澳門舉行嘅演唱會每次門票都係秒速售罄，而佢17號尾場嘅門票，更畀黃牛炒到成 $7,000 一張，相當誇張；而軒公嘅演唱會更為澳門帶嚟至少5億嘅經濟收益，有見及此，主辦方宣佈將會於2025年1月加開四場，作為該場地明年獨家駐場演出嘅頭炮之作。

張敬軒喺澳門演唱會尾場門票被炒到 $7000 一張。

而軒公16號晚嘅演出就有一位特別嘉賓到場，令到已經唱咗14場嘅軒公，笑言呢晚係第一次有種考試嘅感覺：「因為我人生之中其中一位偶像、可以話係我嘅音樂啟蒙老師嚟咗。今晚係我嘅職業生涯當中一個十分之Remarkable嘅一晚，我要喺度多謝陳慧嫻小姐，多謝你。」軒公仲趁機向對方「表白」，表示對方去讀書前嘅演唱會，自己係由頭睇到落尾，就連《跳舞街》嘅Step佢都仲可以跳得出，軒公表示：「以下呢首歌可以話係我未變聲嘅時候我唱得最似你，因為我學緊咬字，同埋我覺得你好靚，嗰個演唱會個頭紗同埋嗰條裙，我每次唱呢首歌嘅時候我都覺得好似有一個任務喺身，送俾大家呢首歌《夜機》。」

呢晚陳慧嫻都去咗睇軒公演唱會。
去年軒公喺英國倫敦Royal Albert Hall舉行三場演唱會，令佢成為首位及打破喺RAH連開三場嘅香港歌手紀錄。隨後軒公將呢個演唱會帶到澳門延續下去，於去年12月至1月嘅15場演出為第二章節；而今晚17號嘅演唱會則會係第三章節嘅最後一場，同時軒公又再刷新咗單一歌手一年內於澳門開騷嘅場次紀錄，以及其個人紀錄。
軒公嘅演唱會為澳門帶嚟 5 億嘅經濟收益。
每次完show後軒公都會喺場館外同「接放學」嘅歌迷見面，更對歌迷嘅訴求有求必應，而喺開show前，有歌迷就喺網上「請願」希望軒公可以唱鄧小巧嘅《神愛世人》，喺16號晚「接放學」時，軒公終於實現大家願望：「我未認真學隻歌，我第一次唱，我自己喺屋企沖涼房唱，我成日聽。」然後就便唱出一段副歌，唱畢後笑說：「失禮晒小巧㖭。再一次多謝大家，大家玩得好開心，係玩我玩得好開心呀，哈哈。」