鄧麗欣出道22年終踏紅館舞台 為最好狀態拍海報戒口節食

 
鄧麗欣（Stephy）宣布將會喺2025年3月14及15日，舉行一連兩場紅館演唱會。Stephy出道22年，首次踏上紅館舞台開騷，呢一步真係走來不易，所以連演唱會主題名「STEP by STEPHY」都係寓意Stephy一步步行上嚟，終於達成喺歌唱事業上嘅心願！
 Stephy以一身黑色高貴晚裝拍攝演唱會海報。
早前Stephy以一身黑色高貴晚裝拍攝演唱會海報，加上一頭長髮隨風飄逸，望落簡潔有型。Stephy笑言：「呈現嘅感覺好舒服，但我一啲都唔舒服，睇落好似『無乜嘢』嘅動作，其實我已經book定脊醫，聽日睇醫生。因為條裙中間有少少皺褶，為咗呈現利落嘅形態，擺甫士都好花力氣，好彩我不時有拉筋和練瑜伽，先至可以應付到。」鏡頭前瀟灑，鏡頭後Stephy被幾把風扇從唔同方向吹住一頭秀髮，佢就話：「其實都辛苦大家要企高和趴地，唔同角度幫我吹風。我係今日嚟到先知道條裙咁窄，所以大家開餐我都唔敢食嘢，只係食咗兩粒蕃茄仔。」
 

演唱會名為「STEP by STEPHY」，寓意Stephy一步步行上嚟。
Stephy表示，當佢知道要喺紅館開騷時真係反應唔到，仲諗咗陣件事到底係咪真：「其實過咗好耐先至識得去興奮、開心、緊張，心情好複雜，係我歌唱生涯之中，最大成就解鎖。紅館有一種魔力，係好多歌手嘅最終夢想，對我嚟講亦好大意義。最大關鍵係點樣將我咁多年以來嘅故事、經歷同大家分享，能夠令大家好鍾意呢個騷就係另一個成就解鎖！」

Stephy話非唱不可嘅歌有太多。
至於哪首歌係非唱不可？Stephy笑說：「一定要唱嘅歌就實在太多啦，尤其是經典歌實走唔甩。其中有首歌，如果唔唱一定唔放過我，就係《Fantasy Tale》。因為呢首歌俾大家好多回憶，或者好多唔同嘅意義，係一首好開心嘅歌。」Stephy由女團出道，跳唱係她成長嘅紀錄，所以佢都有啲『身癢癢』想跳吓舞，不過佢都話：「好耐無試過喺咁多人面前跳舞，有啲緊張同期待。」她又透露有構思其他驚喜表演，目前要先賣關子。