萬千星輝賀台慶｜57周年舊部回巢與眾同樂 11.19掃QR Code搶豐富獎金獎品

為慶祝無綫電視57周年台慶，一年一度嘅《萬千星輝賀台慶》11月19號晚就會喺將軍澳電視廣播城舉行，今年主題係「同一家人，與你前行」，所以今年盛典除咗一眾藝人之外，亦會邀請唔少昔日無綫藝人好友「回家」助慶。

TVB 日前已公開官方宣傳片，率先公布 顧紀筠 林曉峰 將回歸擔大旗任司儀，而 蘇永康 吳啟華 燦神廖偉雄 亦會「返嚟一齊玩」。至於闊別無綫15年，久未露面嘅首屆「超級巨聲」主持劉美君，仲專程由美國三藩市返港參與演出，當晚出席嘅唔同年代無綫藝人超過200人。
今年台慶將有顧紀筠、林曉峰主持，劉美君由美國返港演出

今年TVB 亦破天荒與眾同樂，連觀眾都有份參與壓軸舉行嘅大抽獎環節，幸運兒將有機會贏得機票、名貴汽車，同總值57萬港元嘅獎金同獎品。參與遊戲玩法相當簡單，只要登入無綫官方網站tvb.com，預先或喺當日登記同認證手機號碼，就可以喺《萬千星輝賀台慶》當晚，透過掃描節目電視畫面嘅QR Code進入遊戲頁面，參與「萬千星輝估啱數」同「誰是中獎藝人」競猜遊戲。
當晚藝人同觀眾嘅獎金獎品非常豐富

當中嘅「誰是中獎藝人」競猜遊戲，《萬千星輝賀台慶》當晚會即場抽出6名藝人角逐3份「台慶大獎」，參加者只要進入遊戲頁面，由6位幸運藝人名單中揀選1位「心水中獎藝人」，只要估中3位「台慶大獎」中獎藝人嘅其中1位，被抽中並答啱簡單問題，就有機會贏取同該名得獎藝人相同類別嘅獎品以及其他豐富獎品。(名額3個)凡參與「誰是中獎藝人」競猜遊戲嘅參加者，仲有機會贏取其他豐富獎品1份。(名額57個)
將再拍攝TVB劇集嘅吳啟華、燦神廖偉雄同蘇永康都將會現身

至於「萬千星輝估啱數」競猜遊戲，節目當晚會展示一個以商品砌成嘅「商品金字塔」，觀眾需目測猜出商品盒總數目，估中數目或數目最接近嘅參加者，被抽中並答中簡單問題，就有機會贏取總值超過2萬港元嘅豐富獎品。(名額10份)更多參與競猜遊戲相關詳情，可登入 tvb.com 進一步了解。
今年觀眾亦有機會同藝人一齊參與抽獎

而今個星期開始，TVB會陸續推出一系列「藝人賀台慶」宣傳片，參與藝人包括陳豪、譚俊彥、蕭正楠、陳法蓉、張振朗、陳煒、陳曉華、蔣家旻、吳若希、陳楨怡、莊思明、徐榮、應屆港姐冠軍倪樂琳，仲有新進上位小生、小花郭珮文、何沛珈、廖慧儀、梁凱晴、「東張女神」梁敏巧、吳偉豪、阮浩棕等，加上「聲夢畢業生」張馳豪同冼靖峰等；而朱敏瀚將負責喺公布台慶大獎與眾同樂嘅宣傳片中，宣布獎金同獎品總值超過300萬！

《萬千星輝賀台慶》11月19號晚 20:15 翡翠台 現場直播