黃曉明女友葉珂突宣布退網 稱身體不適反擊連日是非

黃曉明同新歡葉珂嘅是非每日都有新版本，先係早前傳出男方將會豪擲5億，喺香港舉行婚禮迎娶葉珂；之後再傳出葉珂懷孕，但因逼婚不果要求2.7億分手費；再後來又有娛樂博主將葉珂嘅電話錄音曝光，指自己係窮人並非富婆，同前夫離婚時係「裸離」。喺傳聞滿天飛嘅時候，今日（10號）葉珂就喺微博突然宣布：「因身體不適和家人原因，決定退出網路。」
葉珂今日（10號）突然宣布退網。
自從黃曉明於9月19日承認與葉珂相戀後，關於女方嘅傳聞就不斷，由整容、炫富到昔日喺網上嘅言論如「伍佰唱猥瑣的歌」、「《今天你要嫁給我》丟人曲目」等，都被網民再度考古出土。
近日不斷有關於葉珂嘅是非。黃曉明喺9 月19日承認與葉珂相戀。
身為話題中嘅女主角葉珂，今日就喺微博發文澄清，佢先同大眾誠懇地道歉，指連日嚟因為一啲媒體不實嘅言論，同自己過往嘅言論，而佔用咗公共資源，為大眾帶嚟唔好嘅影響，之後葉珂又喺帖文中寫道：「這兩個月以來，網傳的天價扶養費，名媛培訓班等傳聞都不符實，懇請相關媒體，不要再傳播謠言。前夫無出軌等原則性問題，各自安好。這些天也對自己進行了反思，意識到自己有很多不足，以前不是公眾人物，以後也不會是，平凡人只想回歸平穩安靜的生活。現因身體不適和家人原因，決定退出網路。再次給大家道歉，希望大家一切都好，平安順利！」
早前有傳黃曉明將豪擲 5 億娶葉珂。
葉珂日前被影到喺黃曉明陪同下去產檢，而佢嘅閨蜜亦喺網上為對方發聲，指網暴影響到孕婦心情，懇請大家唔好再攻擊葉珂，而家葉珂喺帖文中又指「因身體不適和家人原因，決定退出網路」，難免令人覺得佢因為輿論壓力而退網。
之前有網民指葉珂不時喺網上炫富。