劉青雲為新片露出「優質股」 張艾嘉用一字表達入圍金馬影后心情

香港亞洲電影節呢日舉行閉幕禮，劉青雲、張艾嘉、林嘉欣、谷祖琳、劉奕兒、梁雍婷、熊諾頤及蘇文濤等演員均有出席。

由青雲主演，改編自真實倫常慘案嘅新片《爸爸》，呢次同兩位新演員熊諾頤及蘇文濤飾演一家人，青雲話感覺相當新鮮，仲話可能因為大家嘅八字好夾，所以先能夠咁快咁演好一家人嘅感覺。

劉青雲、谷祖琳同兩位新演員演繹一單倫常慘案
戲中飾演妹妹嘅熊諾頤，坦言對被飾演哥哥嘅蘇文濤，殺害嘅一場戲感覺最為深刻，而飾演佢哋媽媽嘅谷祖琳，都話對呢場戲好深刻，又透露當初導演冇諗住係咁拍，但因為當日大家嘅氣氛以及兩位小演員都非常在狀態，於是導演先決定拍攝。青雲喺戲中除咗有多場情緒戲考演技外，佢仲有一場露股大尺度嘅演出，青雲就指呢場戲非常重要，係用嚟表達戲中角色失去咗啲咩。
青雲片中亦會有大尺度演出

而由張艾嘉、林嘉欣、劉奕兒主演嘅電影《女兒的女兒》則喺閉幕禮中首映，張姐同奕兒更憑呢套戲齊齊入圍角逐金馬影后同女配角，張姐就話覺得做好自己嘅角色係本份，所以收到入圍通知時只係「哦」咗一聲，至於問到佢有冇信心奪獎？佢就話好睇評審鍾唔鍾意，但自己做得好唔好就心裡有數；而奕兒就話自己已經盡咗力，當然會想奪獎，但認為呢個係自己無辦法決定嘅事，所以就好好享受當下。嘉欣表示同張姐認識咗廿年，終於可以演到對手戲，佢話開拍前以為自己會好緊張，但當到場地時，一切都變得好自然呀。

張艾嘉、林嘉欣、劉奕兒亦出席新片嘅首映