林奕匡鬧市Busking唱為子創作新歌 冒險松鼠比喻父母為子女無悔付出

林奕匡 近日初為人父，心情興奮加上踏入人生新階段嘅佢，早前就為囝囝 Darrien 特別創作新歌《搖籃下的歌》。Phil日前仲延續MV情節，打扮成巨大松鼠快閃銅鑼灣同旺角鬧市Busking，吸引來大班觀眾同fans圍觀。

林奕匡日前以MV中嘅松鼠裝到街頭演出
《搖籃下的歌》MV中講述一隻松鼠嘅冒險故事，最後松鼠除低頭套，身份正係Phil本人。民次Phil延續冒險再次著起松鼠裝，將MV故事帶到現實，Phil話：「今日想將MV主角松鼠仔介紹畀大家認識，佢喺MV攀山涉水、周圍探險。其實就好似我哋做父母咁，何嘗唔係要攀山涉水，照顧好自己嘅仔女呢？所以今次就係想帶住呢個咁有意義嘅message送畀天下間嘅父母，同埋佢哋搖籃入面嘅BB。」

雖然當日一號風球生效，不過活動順利就進行，Phil先以充滿正能量嘅歌曲《一雙手》展開演出；其後再演繹《搖籃下的歌》，現場仲有唔少朋友「一家大細」觀賞，Phil又送贈松鼠糖果予大家又逐一合照。
Phil話希望為囝囝唱嘅新歌令大家都感受到父母嘅付出

Phil亦分享同囝囝間嘅互動，佢話Darrien轉眼已兩個多月大，仲越來越多表情反應，仲話當自己向佢唱新歌時識得隨歌聲搖擺同露出笑容，非常可愛。