黃妍獲黃偉文打造文青情歌 新作MV大玩虐心女女戀

黃妍（Cath）繼《告白前先看天氣預報》後，再度推出以愛情為主題嘅新歌《咖啡 鴛鴦 奶茶》。是次新歌由林奕匡作曲，黃偉文填詞，聯手為Cath量身打造虐心情歌。 

黃妍嘅新情歌《咖啡 鴛鴦 奶茶》推出

今次新歌以飲品形容一段關係中有唔同個性嘅兩人，而Cath就指自己絕對會係咖啡。Cath解釋因為奶茶只可以係茶同奶嘅組合，但咖啡可變「齋啡」、「奶啡」，甚至成為其他組合，而佢更渴望成為好似咖啡一樣嘅人。Cath又分享擇偶條件：「太唔同好似兩個世界溝唔埋；太一樣所有缺點都會放大，所以就要鴛鴦啦！」 

佢又形容自己係歌曲主題飲品中嘅咖啡

呢次新歌MV再次邀請THAIMAY主演，成為上首歌《告白前先看天氣預報》續集。為呈現出歌曲中包含嘅兩種特性，MV喺畫面以至色調上都別出心裁，令樂迷有遊走於法國電影同港產片之間嘅感覺。今次MV故事更以「女同」愛情為主軸，THAIMAY 同另一位女主角Kuku更有大膽接吻鏡頭。喺導演 Pazu 解讀中，或者咖啡同奶茶可以行埋一齊，但最終變唔成鴛鴦，彼此之間「緣份」唔夠。

新曲MV以兩個女性嘅戀情作主導

而負責填詞嘅Wyman以咖啡及奶茶比喻一段關係中嘅兩種人，Wyman解釋呢種兩元對立嘅諗法，主要係受到 demo 嘅旋律引發，而且歌曲嘅Verse同Chorus有好大對比，分別為佢帶嚟法國電影同傳統廣東歌感覺。所以Wyman喺Verse及Chorus嘅用字都特別用心，前者以較文藝字詞；後者用傳統廣東歌較淺白嘅用字，希望可以描繪出樂迷心中黃妍「文青」形象同時，建構出一條連接典型廣東歌、以至「黃偉文式」歌詞嘅橋樑。

Cath日前喺音樂會已為大家首唱新歌

Cath收到Wyman為自己度身填寫嘅歌詞時，就形容自己好似「小朋友拆禮物」。Cath又話 Wyman呢份歌詞，非常可以反映出自己嘅性格：「因為我好鍾意睇書啦，但同時又好鬼『地』，今次份詞正正就有呢個效果。」Cath 更形容 Wyman 嘅詞為佢喺錄音同演繹時帶嚟好大幫助：「因為首歌唔係我寫，我要學習個 melody。有阿Y份詞之後我學得超快，超易記！」 

佢又預告將會到唔同地方演出

Cath喺日前舉行嘅音樂會上亦首唱新歌，更預告會帶住作品遊走各個地方演出，叫粉絲們多多期待。