破．地獄｜開畫破紀錄衛詩雅謝票爆喊 黃子華傳短訊鼓勵或有機會歸隊

由 黃子華 同 許冠文 主演嘅新戲《破．地獄》一開畫就刷新9項紀錄，包括「香港電影開畫日最高票房」、「香港電影開畫日最高入場人次」、「香港電影最高開畫日累積票房」、「香港電影開畫日最多場次」、「2024中西片單日最高票房」、「2024中西片單日最高入場人次」等紀錄。

《破．地獄》一上畫就已經破足9項紀錄，認真犀利
有咁好嘅成績，電影團隊上下當然非常鼓舞，呢日導演 陳茂賢 就聯同 衛詩雅 韋羅莎 梁雍婷 去到戲院謝票。見到觀眾反應熱烈，三位女演員大爆佢哋一見面就抱頭大喊，非常之激動。其中韋羅莎更大爆導演陳茂賢嘅媽咪一個美麗嘅誤會，原來陳媽媽誤會阿囝要去戲院破地獄1000場呀。
三位女演員收到好消息仲高興到相擁落淚

而電影其中一位靈魂人物黃子華去完東京電影節返港之後 ，就投入同劉嘉玲主演嘅舞台劇綵排未能到場謝票，但子華都有傳短訊息鼓勵拍檔：「能夠破紀錄感覺非常奇妙，我相信電影的成功是因為它能夠給觀眾奇妙的感受，希望這奇妙的旅程可以走得更遠。」 而導演透露如果反應再熱烈啲，票房再升可能有機會打動子華同許冠文兩位神級人物出動謝票咁話。