破．地獄｜票房衝破4千萬海報劇照展重臨 子華片中為金燕玲遺體化妝細節跟到足

少有以喪葬為主題嘅電影《破·地獄》上映以來，票房口碑俱佳，除咗一舉刷迎多項開畫日紀錄之外，至星期六中午票房已經迅速衝破4000萬大關。

《破·地獄》上映後就掀起全城討論，透過由婚禮策劃轉任婚禮策劃嘅 黃子華 所飾演嘅魏道生，了解呢個傳統亦充滿神秘感嘅行業。而近日公開嘅幕後花絮，仲見到子華親自為猝逝嘅「蓮姐」 金燕玲 遺體化妝。
子華為「蓮姐」細緻化妝，跟足專業程序

子華為求演出逼真，埋位前跟專業遺體化妝師了解每一個步驟，拍攝時細心完成消毒、上妝與梳頭等過程，表現一絲不苟。開拍前子華早已做足準備功夫，與劇組研究大量禮儀師資料，由死人化妝、起回骨殖、安排喪禮等流程都有了解。

子華仲笑言日後可以轉行：「我好慶幸參與咗一部好真實，好多research嘅戲，如果我有一日冇得撈，我覺得我都比一般人優勝，去應徵禮儀師呢個崗位。」佢又提到同秦沛一同拍攝嘅和合石場景，兩人專業還原整個「執骨」過程，由起墓到打開金塔，為屍塊頭骨消毒等程序都一一展現。
金燕玲亦親自瞓於棺木拍攝

子華亦於現場同有關專業人士交流，驚嘆殯儀業嘅專業同嚴謹：「執骨係一個好專業嘅工作，佢要從先人執返齊咁多件骨，呢啲係我哋平日睇唔到嘅嘢，我喺呢套戲真係長知識。」又大讚電影美術組製作嘅屍塊同頭骨都相當迫真。

金燕玲於場景中亦親自躺入棺木「演出」，一直忍氣力求逼真完成。呢場戲亦係佢嘅煞科戲，事後佢更感觸落淚話：「我係一個好感性嘅人嚟嘅，可以參與到今次工作，我哋付出少少，同到後生一輩合作幫到佢哋，我都覺得係一件好值得嘅事。」
再同衛詩雅合作嘅金燕玲大讚對方表現

佢亦即場大讚衛詩雅嘅出色表現，指合作《不日成婚2》後一直見證其進步同成長：「佢係一個好努力，同希望有成長嘅演員，我會特別珍惜呢種演員。」Michelle亦向金姐姐獻吻感謝。戲中Michelle以細膩內斂演技詮釋，喺停屍間面對「蓮姐」遺體時嘅神情，令唔少觀眾都心酸落淚。
劇情中與蓮姐告別一幕令唔少觀眾動容

另外，《破．地獄》海報劇照展今日(11月16日)起移師銅鑼灣舉行，將再度展出美術大師張叔平親自操刀設計嘅電影海報，與及由著名海報設計師方序中設計嘅國際版海報。當中亦包括劇照攝影師小雲拍攝嘅多張電影劇照、前導及正式角色海報。當中有多張從未曝光嘅電影劇照以及製作背後資訊，於展覽期間陸續新增展出。而整個展覽最矚目嘅，相信係戲中一件大型紙紮汽車道具，經後期修復後亦會首度於展覽公開，同場亦有限量電影紀念品供影迷選購。
電影海報劇照展將於銅鑼灣舉行

《破．地獄》海報劇照展：羅素街22-24號0 e:ffect Concept Store二樓