電影泉攻略丨黃子華指家人為其準備碌柚葉《Red One 拯救隊》分享童年聖誕願望丨EP129

王鎮泉 Jeoffrey 每星期為觀眾提供最熱辣電影資訊，中外猛片專訪花絮上映時間全部集齊，「電影泉攻略」個個星期陪你睇新戲。

以香港殯葬業為主題嘅電影《破。地獄》票房勢如破竹，主演之一嘅黃子華神呢日就同導演陳茂賢嚟到「電影泉攻略」同大家分享拍攝點滴。
黃子華喺新片扮演一名喪禮經紀

戲中女主角衛詩雅須親自上陣做破地獄儀式，但現實中因為女性有月事嘅關係，所以呢個傳統道教儀式係傳男不傳女，導演陳茂賢直言拍攝時都有啲阻礙，惟有開拍前請眾喃嘸師傅先行離場。而子華神亦指每次拍電影都總會有一啲阻滯，好似之前拍《毒舌大狀》時，都有在旁協助拍攝嘅律師，對劇情提出一啲反對嘅意見。
導演為新片花盡心力，曾剪輯多過唔同版本

新戲題材少不免有殮葬儀式等，導演就話雖然大家都百無禁忌，不過劇組為求大家安心，都會準備定火盤等，而子華話佢嘅家人好認真，喺拍完套戲後為佢準備咗碌柚葉，但子華就笑言拍完都會有補拍，所以都冇用。

呢個星期嘅新片《帝國驕雄2》，主演嘅Paul Mescal、Joseph Quinn同Pedro Pascaltyu就喺製作特輯中，同大家分享拍攝呢套電影嘅難忘之處，而Denzel Washington則指而家好多電影嘅製作，都比唔上《帝國驕雄2》。
新片《Red One 拯救隊》竟然會綁架聖誕老人

喺電影《Red One 拯救隊》入面，美國隊長 Chris Evans同The Rock Dwayne Johnson要聯手拯救被綁架嘅聖誕老人，早前泉叔就同一班演員做咗個獨家專訪。提起普天同慶嘅聖誕節，Chris Evans同The Rock都話係佢哋嘅最愛。
華裔演員劉玉玲亦於新片演出

傳聞聖誕老人會為小朋友實現願望，問到Bonnie Lynn Hunt 同 Jonathan Kimble Simmons童年時曾許過嘅願望，Jonathan Kimble Simmons就搞笑表示要先為大家搞清楚，聖誕老人只會為乖嘅小朋友實現願望，而佢曾不喺名單上，Bonnie Lynn Hunt則指自己兒時想要一隻手錶，但因為佢喺一個好多小朋友嘅家庭中長大，所以當時媽媽就買咗一個錶面同四條錶帶，令佢同其他姊妹可以共用。而Kiernan Brennan Shipka就指細個時好想去表演，估唔到長大後真係成真； 而劉玉玲指以前自己好想進入娛樂圈，但當時覺得係一件遙不可及嘅事，而呢個願望亦係自己一直追求至今。Kristofer Hivju就話自己細個好想要一款擁有爆炸性肌肉嘅玩具，佢又指自己喺今次套戲入面，就飾演一個肌肉男，所以都叫做願望成真呀。