Sammi與Mike JC現身馬場獻唱 陳豪即場調製雞尾酒教嘆靚啡

鄭秀文  Joey Tang 曾比特 JC陳詠桐 仲有陳豪 等參與星期日喺馬場舉辦嘅音樂會，幾位唔同世代同音樂風格嘅歌手，現場演繹多首經典歌曲，而陳豪就以品牌大使身份於現場開設期間限定店，又親自為來賓以咖啡同茶調製多款雞尾酒，仲即場分享咖啡心得同示範手沖咖啡。

幾位歌手參與喺馬場舉行嘅音樂會，由Mike打頭陣
音樂會一開始就由曾比特率先上場，佢以標誌嗓音分別演繹林志美嘅《初戀》、陳奕迅嘅《黃金時代》等歌曲，又首次公開演出全新R&B歌曲《Talk to me》。之後同樣擁有好歌喉嘅JC陳詠桐接力登場，先後為觀眾演繹王菲嘅《夢中人》、葉蒨文嘅《乾一杯》，又獻唱佢嘅大熱國語歌《說散就散》。 

JC陳詠桐亦有份參與演出

之後輪到Joey Tang出場，佢仲即場接受觀眾點唱，連串歌曲好似《記憶棉》、《數碼暴龍3 馴獸師之王》、《愛情陷阱》、《浪子心聲》仲有《留住我吧》，統統有求必應，Joey仲邀請Mike一齊合唱《紅色跑車》，令現場氣氛繼續高漲
Joey Tang唔止參與演出，仲即場公開俾大家點唱

天后Sammi則壓軸以一身全紅色打扮登場，以首本名曲《眉飛色舞》同《終身美麗》，將全場觀眾嘅熱烈情緒推向高峰。Sammi更對有Fans專程由內地同海外趕來馬場見面非常感激。 而一向熱愛鑽研咖啡嘅陳豪，亦應邀客串擔任「調酒師」，為嘉賓調製活動限定嘅加上咖啡或者茶嘅雞尾酒。Moses又分享品嚐同調製靚咖啡嘅心得同技巧。

Sammi呢日壓軸出場

Moses為嘉賓現場調製雞尾酒