萬千星輝賀台慶｜蔡潔鍾翠詩幸運中大獎 曾志偉表揚新人環節眼濕濕

《萬千星輝賀台慶》11月19號晚隆重舉行，全台藝員總動員齊齊祝賀TVB周年紀念，而每年台慶重頭戲一定係抽台慶大獎，今年大獎係價值28萬電動車嘅幸運得主，就係早前因為水浸而報銷愛車嘅 蔡潔 ，連佢自己都覺得係天意嘅安排，佢仲好興奮咁話可以揸新車返工，同埋可以車佢班兄弟姊妹遊車河。

年初返工遇到嚴重水浸座駕Total Lost嘅蔡潔抽中新車
而終極大獎43萬港幣理財存款，就由首次參與台慶嘅應屆港姐 鍾翠詩 幸運中獎，佢話真係難以置信，又話已經打算請家人同埋港姐好妹妹食飯，當然唔少得做下善事回饋社會。今年台慶亦邀請唔少藝人重返娘家，勾起大家嘅集體回憶。
參選今屆港姐嘅鍾翠詩則得終極43萬大獎

咁開心嘅氣氛當然唔好比佢停，完騷後嘅慶功宴，行政主席 許濤 就即場預告，有關加薪、升職之類嘅好消息，將會留喺嚟緊嘅盆菜宴宣布。除此之外，TVB提攜新人一向不遺餘力，當中表揚新人嘅環節，連總經理 曾志偉 都感動到眼濕濕。
完騷後嘅慶功宴中，行政主席許濤指將向員工宣佈好消息

好似奪潛質男新人獎嘅廖家爵，就係已故藝人廖駿雄嘅兒子，志偉話見到佢嘅下一代亦加入TVB，兼用心做好演員嘅本份，唔單止令佢覺得感動，好多同事以及高層都一樣咁感動啊。而問到志偉有無打算叫林峯多啲返TVB工作？ 志偉就話當然想，但可惜阿峯真係太忙，要請佢的確唔容易呀。

志偉感謝林峯重返TVB演出，亦對新一代演員一段非常感動