音樂女神海兒成《中聲》最年輕評審 被身障參賽者啟發正向面對人生

被網民譽為「音樂女神」嘅 海兒 加入《中年好聲音3》擔任評審，見證香港區45強產生嘅過程，身為節目最年輕的評審嘅佢，亦喺社交平台分享感受。

首次擔任流行曲歌唱比賽評審嘅海兒話：「之前有做過古典音樂比賽嘅評審，今次流行音樂加上綜藝元素係第一次。」主攻古典音樂嘅佢事前亦做足準備功夫：「因為自己學咗8年嘅Classical Singing都係用英文教學，好多關於唱歌技巧、用詞都只用英文，所以上節目前，我會喺一啲重要嘅詞彙、常用嘅字睇返中文詞語，唔想過分中英夾雜。」
海兒主攻古典音樂，早喺《中聲3》海選現身時已令唔少網民眼前一亮

佢亦翻睇過去兩輯《中年好聲音》，又狂聽流行歌曲做功課：「自己模擬返拍攝情況，到第一次聽完參賽者表演，即刻就根據自己寫嘅notes、搵出每個表演者好同可以改善嘅地方。」
之後亦加入《中聲3》評審陣容當中，被譽為音樂女神

不過首次拍攝綜藝節目亦有不少趣事發生，海兒話：「海選嘅時候要認真聽、分析參賽者嘅聲音，我會瞌埋對眼，因為我覺得瞌埋對眼可以shut off咗一啲感官，我嘅聽覺會敏感少少，所以我好多時間都會瞌埋眼。到中場休息，我經理人走過嚟同我講啱啱嚇死佢，因為佢以為我瞓咗，佢勁驚，哈哈，滴晒汗，點解我可以瞌埋眼咁耐，呢件事真係好好笑。」
身為張敬軒同公司師妹嘅佢，每次評審工作都做足準備

海兒又指呢次經驗對自己有唔少得著，其中一位失去雙手嘅參賽者 李金凱 印象特別深刻：「佢好勇敢咁企喺台上面，唱得非常之好、好震撼。最令我印象深刻係佢超級正面，正當好多人為佢嘅遭遇感到傷心嘅時候，其實佢非常之positive，佢令我感受咗好多，特別係音樂、做人處世同埋面對難關方面，亦都係對大家一個好好嘅Inspiration。」

其中一位身障參加者令佢印象非常深刻