劉佩玥自揭右眼有眼疾 林秀怡指敏感部位與周嘉洛零接觸

劉佩玥同林秀怡呢日去到小學宣揚護眼知識，平日大家睇到女神單眼就梗係會諗佢係咪放緊電啦，但呢個情況如果放喺阿Moon身上就係另一個故事喇，因為阿Moon話佢嘅右眼係患有先天性眼疾，所以平日大家見佢成日單眼，其實係佢眼睛冇力fouse唔到，所以有時影相佢fouse唔到時，就惟有單起隻眼扮cute喇。由於有眼疾問題，阿Moon話自己都特別關注眼睛健康，所以今次可以同秀怡一齊教小朋友護眼知識都相當開心。

阿Moon呢日出席護眼活動，仲話自己有時單眼並唔係放電，而係唔舒服呀
見到阿Moon同啲小朋友玩得咁開心，許文軒就提議佢不如自己生返個，但阿Moon就話自己只係鍾意玩人哋嘅小朋友，佢又指因為自己喺家中嘅身份係家姐同表姐，習慣咗照顧人，加上自己同小朋友嘅靈魂同心境都好夾，所以大家玩得好開心。
佢同秀怡呢日同一班小朋友齊齊玩遊戲學習護眼知識

啱啱過去嘅《萬千星輝賀台慶》，秀怡有份同周嘉洛等演出趣劇，不過按摩椅畫面就引起網民無限遐想，大家都好好奇到底嘉洛有冇掂到秀怡嘅敏感部位呢？呢日秀怡就堅決咁話同嘉洛係零接觸，佢指當日同對方係有一定嘅距離，但可能係因為顏色同角度嘅關係而令大家誤會呀。

秀怡又澄清喺台慶趣劇同周嘉洛嘅一幕，話完全無接觸，大家太過敏感喇