關嘉敏玩出賣系列惡搞譚輝智 本尊親回：賤格偷影我換衫

TVB《萬千星輝賀台慶》圓滿落幕，但餘溫不斷，唔少藝人將當晚華麗打扮及演出上載社交平台，當晚譚輝智同關嘉敏（Carman）首度合體演出歌舞，兩人仲以孖公仔造型現身，連本尊輝智話Carman比自己更似自己，直頭入咗血。

關嘉敏將當晚華麗打扮上載社交平台。
Carman見觀眾反應咁熱烈，於是就追加一個惡搞，喺IG先出文字Po話出賣系列，十分鐘後Delete，譚輝智著咗我件台慶晚裝，決定同大家開心share，之後就見到貌似輝智嘅佢著上晚裝長裙，睇落真係分唔清相中人係Carman定輝智，只係睇樣真假難辨，要睇身材先有明確答案。Carman仲Tag埋輝智話感覺好Fresh，引來輝智親自回覆：「賤格，偷影我換衫。」

當晚譚輝智同關嘉敏首度合體演出歌舞！
好多網民睇完留言話分唔清佢哋邊個打邊個，以為佢哋係失散多年兄妹重逢，真係以為係輝智著咗晚裝，似到一個點令人好亂，亦有人讚Carman幾好身材。
貌似輝智嘅佢著上晚裝長裙，睇落真係分唔清相中人係Carman定輝智！？