中年好聲音3｜PK戰展開張與辰被封「男大魔王」生命鬥士李金凱獲5燈直接晉級

香港賽區、大灣區同新馬區嘅《中年好聲音3》60強選手正式大混戰，24號晚播出嘅第一回，14位選手中有兩位選手獲得5燈直接晉級，佢哋分別係張與辰同李金凱。獻唱《Superwoman》嘅張與辰透露，兒時家裡非常窮困，媽媽母兼父職獨力照顧4兄弟姊妹，係自己心目中嘅Superwoman。

張與辰認為媽媽就係心中嘅Superwoman
佢話：「而家已經唔再係媽媽保護我， 輪到我保護媽媽，希望用音樂成為佢嘅驕傲。」周國豐激讚佢為「男大魔王」，又搞笑勸喻參賽者：「千祈唔好亂咁PK佢，好危險㗎！」就連首次直擊張與辰演出嘅嘉賓評判布志綸，亦取代「長明燈」肥媽，第一人撳燈。

周國豐仲形容佢為「男大魔王」
至於雙去失臂嘅「生命鬥士」 李金凱緊接出場，佢獻唱《給自己的歌》贏盡好評，Alan佢讚靚聲有如太陽般溫暖，伍仲衡亦讚其嘅靚聲「入咪」：「很穿透了我，好厲害！」 

李金凱唔止意志驚人，佢嘅歌喉亦一樣備受讚賞
而其餘選手PK組合就包括：尤志豪《初戀》VS 莫麗淇《明知故犯》、楊炳德《這麼近(那麼遠)》VS 劉洋《偷心》、胡家健《親情》VS 嚴志恒《阿牛》、陳威《普通 朋友》VS 王鄭浚仁《落葉歸根》、張家豪《美麗之最》VS 梁華勝《沙龍》、陳芷盈《Forever Love》VS 陳欣《空白格》。

當中莫麗淇、劉洋同王鄭浚仁都挑戰成功， 安全晉級。製作組亦訪問多位參賽者「最想」同「最唔想」PK嘅對手，全部人都不約而同表示最想挑戰尤志豪，而最唔想同王鄭浚仁仲有張與辰PK。

而鬥爭最激烈嘅，不得不提5燈陳威以《普通朋友》接受5燈王鄭浚仁《落葉歸根》對決，兩人表現同樣跌Watt僅得3燈成績，伍仲衡指陳威嘅假音太假，而張佳添仲狠批佢揀錯歌：「好彩死唔去，跌斷腳！唔係淨係用喉嚨唱，假音唔夠輕、唔夠飄。」布志綸就批評王鄭浚仁欠缺感情： 「情感好緊要，齋聽歌唱技巧好機械。」最終評審投票選出王鄭浚仁挑機成功勝出。

王鄭浚仁被5燈陳威挑機險勝
此外，5燈「譚詠麟2.0」楊炳德今仗表現略為失準獲4燈，佢為展紳士風度同挑戰自己，揀選 5燈唱將劉洋「自殺式PK」，最終劉洋以5燈姿態勝出。而尤志豪繼上次跳唱《狂野之城》獲 5燈好成績後，今次獻唱《初戀》繼續以歌舞演出，噴彩紙之餘又向肥媽派心，可惜過分專注做戲，忽略唱功，搞到走音兼甩Beat，遭肥媽狠批：「走音、甩拍子，你太投入做戲，唔記得咗係嚟唱歌。」最終由同樣2燈嘅莫麗淇勝出。

劉洋繼續以澎湃歌聲再於PK戰勝出

尤志豪嘅演出雖然充滿娛樂性，不過肥媽就嫌佢唔記得唱歌為主喇
《中年好聲音3》 星期日晚 20:30 翡翠台