江若琳爆老公睇新歌MV大喊韓馬利杜燕歌首演螢幕夫婦

相隔3個月，江若琳推出回歸樂壇嘅第2首新歌《一圈》，MV製作認真又富故事性，仲搵嚟一班好戲之人出演，Elanne亦喺社交平台帖文感激杜燕歌韓馬利麥子樂趙伊褘同2015港姐亞軍龐卓欣等人演出，令MV生色不少。佢仲特別多謝杜燕歌同太太Mary姐當初一口答應演出，而今次原來係佢哋夫婦首次演螢幕夫婦。

江若琳重返樂壇嘅第二首歌曲《一圈》推出MV

MV故事以一對情人自小認識一同長大開始

麥子樂同趙伊褘飾演一對戀人
Elanne嘅MV由張子丰操刀拍攝，佢話7月時遇到子丰嘅拍攝團隊，覺得佢哋係好善良、好熱血同好有心嘅伙伴，畀到佢好有安全感，過程中更盡量幫佢完夢，由構思、籌備到拍攝都一絲不苟。最後Elanne大讚麥子樂同趙伊褘嘅演技，完全無對白嘅短短幾分鐘，就令佢睇到好感動，佢仲爆老公蕭潤邦大喊出嚟，嚇親自己。