NewJeans開記招宣布同公司解約 承諾歌迷團名不保依然會繼續出歌

韓國人氣女團NewJeans早前向經理人公司ADOR發出最後通牒，表示如果唔盡快改善公司嘅違約行為，將會喺兩星期嘅法定期限到期之後同公司解除合約，最終New Jeans喺11月28號夜晚開記招，宣佈決定離開公司。
人氣女團NewJeans宣布離開公司。

記招上五位成員以中文同英文交代事件，佢地表示所屬公司ADOR冇盡到照顧藝人嘅責任，繼續留喺公司除咗浪費時間，仲係一種精神折磨，所以冇留低嘅理由。有傳今次解約事件，NewJeans將會面臨六千億韓元嘅違約金，但五位成員就堅決話係公司違約在先，所以絕對無存在違約金嘅問題。
五人召開記者會。
其實自從前經理人公司代表閔珍熙同母公司HYBE爆出內部糾紛已經有半年時間，好多粉絲都擔心原本前途大好嘅NewJeans，未來星途會受影響，NewJeans呢日就向歌迷大派定心丸，承諾大家下年會繼續出新歌，不過可能就唔可以沿用NewJeans呢個團名進行活動。

記招之後，原本遲遲未有動作嘅經理人公司ADOR突然轉變態度，表示收到NewJeans嘅解約通知令全公司職員相當痛心，母公司HYBE亦鬆口回應話會為NewJeans提供所需資源，不過五位成員就似乎冇打算回心轉意。