洪金寶梁朝偉同獲榮譽博士 偉仔透露明年實行監製夢拍動作劇情片

一直對演藝界貢獻良多嘅演員梁朝偉、身兼演員及動作指導嘅洪金寶（大哥大）、粵劇名伶阮兆輝、導演許鞍華、香港藝術發展局副主席及電影發展委員楊偉誠，喺12月5號分別獲頒授演藝學院榮譽博士，以表揚五位成就同對演藝界嘅貢獻。
梁朝偉洪金寶
大哥大嘅太太高麗虹、阿仔洪天明一家四口嚟支持，三代同堂畫面幸福。大哥大話好開心，因為身處台灣同北京嘅阿仔專程返港，事前佢係唔知情，係太太畀佢嘅驚喜。佢又話自己冇諗過得到呢個殊榮，亦成為孫仔榜樣。
洪金寶嘅太太高麗虹、兒子洪天明一家都有出席。
72歲大哥大由細到大最愛電影，今次獲得殊榮故然開心，但佢希望政府多出一份力同積極去支持業界，令到出嚟嘅作品更有質素同更大發展。大哥大話想再執導，但暫時環境改變中，未係合適時間。
梁朝偉 劉嘉玲
偉仔繼早前獲香港科技大學頒授榮譽博士後，相隔兩星期再獲殊榮，太太劉嘉玲亦有陪伴出席分享喜悅，偉仔坦言好似派成績表一樣開心，將會食飯慶祝。偉仔話嘉玲要忙於舞台劇演出，所以聖誕節將會自己跟家人出埠度假滑雪。
偉仔透露現時正寫劇本。
偉仔雖然喺影圈獲得無數獎項同殊榮，原來佢仲有一個心願未完成，就係監製自己演出嘅電影，佢透露現時寫劇本中，若果要開機拍攝應該要明年冬天，內容係動作劇情片，當中可能有父女情，偉仔透露會喺日本同韓國其中一地拍攝，決定邊度拍先再搵當地演員。