StarTalk丨劉青雲片場傾偈成話題終結者 谷祖琳因喪親之痛曾陷抑鬱

劉青雲同谷祖琳主演嘅電影《爸爸》喺唔同嘅電影節上都有相當好嘅口碑，呢日兩位嚟到《StarTalk》同 王鎮泉 講吓呢部改編自享和街倫常慘案嘅電影，拍攝時嘅點滴。

谷祖琳指劉青雲係話題終結者。
雖然已係第4次合作，不過青雲同小谷話因為之前嘅合作中，佢哋嘅對手戲並唔多，而今次喺戲中兩人要飾演夫妻，小谷笑言青雲同女性傾偈時會成為「話題終結者」，雖然每次想搵話題傾偈令彼此更熟悉，但呢啲話題都係極快完結，小谷更分享二人首日見面時，青雲竟然第一句就問：「你屬咩㗎？」完全犯咗同女性傾偈嘅大忌。

片中青雲同小谷飾演一對夫妻。
小谷指拍攝呢齣電影時，大家對青雲相當放肆，對此青雲大讚係好事，佢認為一個演員係唔應該畀人覺得有氣場。小谷分享剛開始拍攝時嘅趣事，佢指當時大家圍埋一齊食飯，青雲突然開口表示不如自己去另一邊食，仲話自己唔在場大家都會開心啲。為此青雲就解釋因為每次自己走近大家都會好緊張起身，而佢坐低後大家又會變得好靜，所以佢先會咁樣講。
青雲喺片場要自己一個食飯？
青雲坦言拍戲偶爾遇到啲對手未必鍾意，就要靠演技幫補，有時人夾人總會係咁，只好刻意製造話題，青雲亦分享佛系人生觀，認為人生唔好太多遺憾，就唔使咁多嘢去釋懷，生活係唔可以逼自己去開心，有時唔開心就唔開心一陣，青雲自嘲做人唔夠積極向上，唔會覺得所有嘢係必要，只要珍惜所有機會，就算拍完出嚟套戲唔收得、冇提名、被人鬧，青雲認為自己至少盡咗力啦。

小谷分享幾年前曾陷入抑鬱。
谷祖琳曾經因喪親之痛，幾年陷入抑鬱，整個人好似行屍走肉，呢次望住青雲戲中嘅角色「阮永年」有好大感受，讚青雲喺戲中角色演得好精準，從「永年」身上學習釋懷，講到呢套戲談及思覺失調呢個病，谷祖琳提及醫管局有思覺失調求助熱線（2928 3283）查詢及轉介。