胡鴻鈞吳業坤關係密切大爆黑歷史 望消除坤嫂敵意嘗試修補關係

吳業坤同胡鴻鈞（Hubert）呢晚舉辦出道以嚟首次合作嘅演唱會，將過去14年長搬上舞台，二人與觀眾打成一片，仲走落台去到場中嘅細台，靠近人群獻唱，掀起全場高潮，佢哋合唱多首金曲，勾起大家無數回憶。

相識多年嘅坤哥同Hubert首次合作演出音樂會
整個演唱會記載住坤哥同Hubert嘅成長，Hubert話同坤哥一齊開騷感覺好chill，冇乜太大壓力，可以盡情跟台下觀眾互動，自己感覺都享受多啲，Hubert笑指喺騷上大爆往事秘聞，公開坤哥男扮女嘅相，堅稱唔係坤哥嘅黑歷史，坤哥話想阻止都唔得，仲話本來Hubert有畀相佢睇，當時坤哥有講唔出得，最終都係播咗出嚟。
呢兩個老友仲互爆對方嘅黑歷史

Hubert同坤哥關係密切，惹嚟坤嫂濱口愛子呻醋，Hubert話經過呢次演唱會，佢好有信心同愛子嘅關係應該冇問題，有望消除敵意，而坤哥擔心純真嘅太太被黑化。

又搞笑話坤嫂因為佢哋太Friend而呷醋