阮浩棕稱與何沛珈了解中 譚凱琪指龔嘉欣身體有好轉

阮浩棕、譚凱琪、何沛珈同羅毓儀等呢日為熱播劇《異空感應》宣傳，劇集喺「萬千星輝頒獎典禮2024」中獲得11項提名，呢日大家當然要把握機會拉票啦！而未能出席嘅 陳家樂 同 陳曉華Hera ，就隔空同大家見面同拉票喇。

《異空感應》狂掃台慶頒獎禮11項提名
台上譚凱琪就表示自己有好多場戲都係同Hera一齊拍，佢指喺拍攝現場Hera相當唔錫身，跳天橋、對手戲等都係親身上陣，非常落力，所以佢呼籲大家投Hera一票。
Hera呢日未有到場，不過就獲讚拍攝時非常投入唔錫身喇

何沛珈講到劇中最難忘一幕，就係要瞓喺曱甴隔離拍攝，佢話當時惟有頂硬上，就連緋聞男友阮浩棕都佩服佢。至於講到喺頒獎禮奪獎嘅信心，阮浩棕就話平常心，又指而家最重要嘅係大家繼續追看《異空感應》；何沛珈就話自己今年有3個提名，佢就覺得要對自己有信心。
緋聞男女阮浩棕同何沛珈同場，仲話要加深了解

唔少藝人都會喺得獎時講下愛得宣言，問到阮浩棕同何沛珈呢對緋聞情侶，到時如果真係得獎會唔會順手公布埋戀情？阮浩棕就即刻扮聽唔明，佢同何沛珈都異口同聲話仲了解緊。
龔嘉欣近日傳身體不適，老友兼拍檔Zoie代為解釋當中問題

龔嘉欣日前喺生日時就透露自己身體出現問題，作為閨密嘅譚凱琪就話自己喺一年前就知道呢件事，雖然喺呢一年不斷睇醫生想搵出原因，但到而家都仲未check到係咩事，不過譚凱琪就話嘉欣嘅情況係有好轉嘅，所以大家唔使太擔心。