周吉佩與太太合作演出全新廣告 間接放閃大讚前港姐萬能老婆

周吉佩 參加《中年好聲音》重新出發再次出道之後，工作日多忙個不停，而賢內助太太 黃彥欣Louise 早前更決定辭職全力支持老公，同幫吉吉打理大小事務。2007年曾參選港姐嘅Louise，唔止全天候照顧吉吉同小朋友，最近仲兩公婆一齊獲邀請拍廣告。

吉吉同太太Louise獲邀參與拍攝新廣告
吉吉就話諗都未諗過有機會同台演出，因為由夫婦關係加上工作拍檔關係，今次更係幕前合作，所以覺得非常有趣。至於萬能太太Louise就指，拍攝時祈求老公搞少一陣事，因為至驚要演戲忍唔到笑喎。
不過佢哋事先就擔心恩愛畫面會笑場喎

吉吉又指曾要求導演盡量減少甜蜜鏡頭，因為擔心老夫老妻一望對方就會忍俊不禁呀。轉頭吉吉又話認為太太非常上鏡，仲懷疑係客戶揀中老婆靚樣，今次自己只係陪襯。而Louise就話希望有機會可以一家四口一齊上陣，齊齊拍廣告一定會好開心咁話。