愛‧回家之開心速遞｜播出時段有新安排 單立文想親寫劇本開熊家外傳

《愛回家之開心速遞》一眾演員拉大隊同大家預祝冬至同聖誕節，呢個大家庭一齊玩遊戲應節，大家都玩得好投入，而喺活動上，劇組更有重要消息宣布，《愛回家之開心速遞》，將會喺明年1月6日起，播映時間安排喺逢星期一至五，晚上8點，對於呢個新安排，豹哥單立文就有個新念頭話星期六日歡迎開熊家外傳，丹爺劉丹就話係個好提議，叫豹哥自己寫劇本，呂慧儀Konnie就叫豹哥創作埋主題曲一條龍。

《愛回家之開心速遞》明年1月6日起，播出時嘅將會有所調動。
豹哥熱愛工作之餘都好識得享受人生，早前佢同豹嫂胡蓓蔚就去咗法國旅行，講到難忘嘅體驗，豹哥就賣口乖話只要係同老婆一齊無時無刻都咁開心，因為太太每年生日都想外遊放鬆，所以每年11月都會一齊去玩吓，而今次最特別係兩夫妻嚟咗個深度遊，放棄坐車，而改為行路代步，每日行足三個鐘，真正體驗法國人生活。

熊家
下個月舉行嘅萬千星輝頒獎典禮，《愛回家之開心速遞》除咗有份角逐《最佳劇集》之外，陳浚霆Andrew同埋何晉樂Rock亦有份角逐《飛躍進步男藝員》，大小姐林淑敏同三太樊亦敏Amy提議男飛躍可以有兩位，希望一齊攞獎。喺呢個場合，三太亦為自己有份入圍嘅獎項拉票。