王梓軒製作主演英語短劇成績不侶 獲韓電視台邀請音樂節目唱跳主題曲

王梓軒 製作，佢同 薛家燕 都有份主演嘅英文網劇《選美兄弟班》(RAGS 2 RICHMOND)已經播出兩星期，劇集觀看次數仲已衝破350萬！負責埋主題曲演唱嘅Johnathan日前更應邀到韓國MBC電視台嘅音樂直播節目《Show！Music Core》邀請，獻唱主題曲《Low Key》，成為首個演出呢個節目嘅香港個人歌手，全開咪唱跳表演亦令佢獲樂迷激讚唱功同舞技。

王梓軒獲邀宴到韓國MB嘅音樂節目演唱《Low Key》
《選美兄弟班》最終回日前已經上架，對劇集成績非常滿意嘅Johnathan話：「反應比我想像中好，真係好鼓舞，都好多謝大家肯接受呢個新嘗試。我哋會繼續做多啲宣傳，希望可以俾更多人欣賞到呢個勵志故事。」 佢又指以後會製作更多同類網劇，又會繼續以英語主題為主：「中文嘅微短劇已經發展得好成熟，而我同珊珊(石祐珊)嘅製作公司想專注做跨國嘅合作，所以暫時會以英語為主。當初都唔知道可唔可以將微短劇同中西方文化混合。今次嘅成績係一支強心針，未來我哋都會繼續做更多唔同主題嘅內容。」 Johnathan又指劇集受到世界各地媒體關注：「其實套劇未播晒嘅時候，就收到日本、馬來西亞電視台有興趣傾播放權，之後收到MBC邀請上音樂節目，我覺得成件事都好夢幻，非常感恩。」
佢製作兼主演嘅《選美兄弟班》成績不俗，佢仲話往後會繼續製作類似劇集

今次韓國之行準備時間原來仲非常短：「由確定演出到企上舞台只有十日。我未試過喺韓國表演，所以一邊做劇集後期一邊練歌，好多謝MBC支持一啲英文歌，仲要係一個未上過佢哋個台嘅歌手，真係好感恩有一個咁嘅機會，所以唔理有幾多時間，用盡全力做咗先！」
呢次韓國行工作之餘亦把握時間一嘗當地美食

這次節目一位伴舞仲係人氣男團 ZEROBASEONE 成員 Matthew嘅姐姐Yaeby，Johnathan指：「一收到演出提案就搵咗一位曾經幫美國喜劇電影《JOY RIDE》編舞嘅編舞師 Joe Tuliao 設計成個表演，喺溫哥華排完舞就馬不停蹄搵韓國嘅舞者練習，其實一開始唔知Yaeby係 Matthew親姐姐，佢係編舞師嘅朋友，合作起嚟好smooth、好愉快，佢人又好好、好專業，當然都跳得好好！仲有韓國各位化妝師、髮型師同促成呢次合作嘅朋友，真係好多謝大家嘅幫忙！」
男團ZEROBASEONE成員Matthew嘅姐姐Yaeby(左一)亦有為Jonathan伴舞

今次為製作劇集，佢已經幾個月未返港，而聖誕節終於可以返屋企：「真係好掛住屋企人，所以會返嚟幾日。不過元旦已經要去美國，因為有新嘅電影Project做緊，到時應該會寫好晒個劇本，之後就要寫歌。」