王丹妮初拍喜劇睇笑片苦練 打戲中拳即怒火中燒

王丹妮 早前參演賀歲片《臨時決鬥》，今次唔止要應付連場動作戲，更要苦練忍笑。Louise指自己係新片演員中最容失笑嘅一員，佢尷尬咁話：「我之前冇拍過喜劇，所以對我嚟講好新鮮，原來亦係一個挑戰，要忍笑真係唔容易，好彩我鍾意睇笑片喜劇，又係一個好容易笑、好容易喊嘅人。不過後來我搵到個蹺妙，喺現場拍攝前同Rehearsal嘅時候都會笑咗先、笑飽佢。到正式拍攝候就盡力忍笑。」

Louise於片中要忍笑之餘，仲要學習泰拳同娜姐對決
至於片中嘅拳擊戲份，Louise就話：「對泰拳我係零知識初學者，由基本動作開始學，有少少難度，但都算學得快，平時同教練切磋，自己再加緊練習；加埋鏡頭配合，感覺都幾流暢。當然同娜姐對打始終有難度，我唔係好有對打經驗，所以要記住每一個Step，唔可以記錯，如果娜姐打左邊，而我記錯咗打右邊，咁又要從頭嚟過，甚至會可能唔小心互相弄傷，練習期間間唔中都會出現咗呢啲小問題，好彩拍嘅時候順利過關。」
今次首戰笑片，仲令佢領悟到唔少「道理」

雖然今次新片迅速完成，不過Louise就非常有得著，佢仲話：「我覺得拍戲一齊去度笑料，令到件事有趣，好好玩！同埋漸漸領略到喜劇用唔同語調節奏，都會令到件事好笑，我就悟出個道理，就係認真到極致而突然做埋啲傻表情同反應，有反差反而都會幾好笑。至於打拳嘅時候，有時被打中幾拳，就會開始出現怒火。其實好幫到入戲，會令自己更加放開做，令場戲更真實及好睇。」

事後佢仲大讚拍笑片經驗非常有趣