魚蛋妹獲古天樂鼓勵搣面珠 梁詠琪胡子彤擂台對打被嚇窒

古天樂、梁詠琪、王丹妮、周秀娜、胡子彤、張文傑同伍允龍早前參與賀歲片演出，古仔同Gigi戲中飾演夫婦，而喺電影《九龍城寨之圍城》令觀眾印象深刻嘅小演員飾演魚蛋妹嘅王尹菁，今次就同古仔喺賀歲片結父女緣。

古仔、Gigi同菁菁喺賀歲新片扮演一家三口
古仔戲內戲外都對囡囡菁菁特別照顧，喺排戲時菁菁就對要搣古仔面珠尷尬，導演仲指導菁菁話：「用啲力，你驚整親佢呀？幾多人想搣佢搣唔到啊？」古仔亦畀信心菁菁：「大力啲，兩隻手搣會唔會好啲呀？」身旁嘅GiGi仲示範點樣搣，子彤就叫菁菁放膽用雙手，最後菁菁不負所托解鎖呢次任務。
呢日一場搣爸爸面珠嘅場面就考起菁菁喇

而GiGi喺戲中飾演計劃復出嘅女星，可惜被視為中女搞出連場笑話。而努力轉營做打女嘅佢同子彤認真排練，點知認真嘅子彤用力出拳，嚇到GiGi高呼：「好驚呀﹗」仲以雙手護頭，又向子彤話：「你可以唔使咁大力嘅﹗」，子彤即點頭示意明白，之後仲轉向鏡頭指要似又唔敢大力，壓力勁大呀。

片中嘅Gigi期望東山再起練拳做打女

同胡子彤對打嘅幕後花絮非常好笑