杜德偉上海巡迴狂跳《脫悼》賀冬至 期待明年香港開騷賀入行40載

杜德偉 世界巡迴演唱會上海站21號晚圓滿結束，因為去年喺當地開騷感受歌迷嘅熱情，所以Alex決定今年特別喺冬至重臨同歌迷過節。Alex唔止首次公開演唱新歌《黑日》，亦唔少得佢最拿手嘅快歌。

杜德偉冬至當日於上海演出
呢晚Alex狀態大勇，完全唔似經已62歲，舊年未唱《脫掉》嘅佢今年補返數，音樂一嚮起全場觀眾即時一同起舞，著住透視上衣嘅Alex仲脫去長褲，一身胸肌同腹肌亦若隱若現。
Alex為現場觀眾狂歌熱舞，令氣氛勁High

Alex同時為觀眾獻唱多首經典情歌，好似新加入歌單嘅《跟我一輩子》、《改變》等，觀眾不時主動一齊大合唱，又全場揮動熒光棒場面感人。開騷前Alex嘅好友；香港時裝大師 劉培基 亦專程到場支持，演唱會前仲同Alex一家喺後台食飯做冬。Alex亦喺台上特別向太太Ice致謝，深情時仲一度哽咽，而愛子AJ亦有到場支持，開騷前更擊掌擁抱Daddy鼓勵。
太太同寶貝仔亦都去到當地現場打氣

好友劉培基仲安排大批佳餚，同Alex一家於後台做節

過去一年Alex先後走訪新加坡、成都、台北、杭州等城市巡唱，Alex回顧2024年形容相當精彩，至於來年計劃，佢就希望喺香港開騷賀入行40周年：「2025年係我踏入演藝圈40周年，係一個難得嘅機會，我希望可以喺香港；我自己出道嘅地方開一個演唱會，唔止一場呀，起碼兩場，最好係四場啊，五場更加好，總之要開演唱會！」Alex周末就會會將巡唱移師馬來西亞舉行，完成今年巡唱壓軸一站，中間就會同太太、兒子一齊留港共度聖誕佳節。