金賢重相隔12年再來港開騷 狂講廣東話冧爆粉絲

憑韓版《花樣男子》、《惡作劇之吻》紅極一時嘅韓星 金賢重 ，2014年被前女友控告家暴鬧上法庭形象大插水，6年前演完韓劇《當時間停止時》就未有新作。近年佢轉型發展自己嘅網上頻道，當年不時都會來港開騷嘅佢，一等就12年先再度來港。

金賢重日前相隔12年再次來港同Fans見面
金賢重選擇喺冬至晚上演出，一班Fans依然相當支持偶像令佢相當感激，雖然咁耐冇嚟，但係金賢重依然記得廣東話點講，仲以連串廣東話冧Fans話：「大家好，我係金賢重。好耐冇見，好掛住你哋， 我愛你！」
仲以廣東話同Fans問好

金賢重之後又用韓文發表感言，多謝大家12年間嘅耐心等待，更希望Fans嘅熱情可以喺兩小時嘅演出中延續。
又現身商場同支持多年嘅Fans近距離接觸

開騷前佢亦現身商場活動見Fans同為大家簽名，被問到想收咩聖誕禮物，時佢就腦洞大開話希望收燒鵝蛋糕，相當之無厘頭又搞笑。而唔少Fans都係喺佢於組合SS501嘅時期開始追隨，明年就係組合嘅20周年，雖然自2011年起成員已展開個人活動，不過好多Fans都希望組合可以重組慶祝呢個大日子，而金賢重就話雖然暫時未有具體嘅計劃，但如果世界各地嘅歌迷熱切期待或許會成事。

又話想要燒鵝蛋糕做聖誕禮物