EYT一代台柱杜平逝世 早年移居澳洲享年88歲

粵語片年代當紅小生；移居澳洲多年嘅《歡樂今宵》台柱杜平(扁哥) 離世，終年88歲。

其子女證實消息，簡短指出：爸爸 (Peter 杜平) 上星期安詳地離開了我們。我們能夠在他最後的日子裡一直陪伴著他。追思會將會在1月25日(星期六)舉行 - 詳細資訊將在稍後提供。謝謝

Harriet & David, Lola, Eddie

一代粵語片小生杜平上周離世
扁哥1950年代末期已入行，當時佢加入中聯影業公司，拍攝作品無數，係粵語片當紅小生之一。後來佢杜平轉投電視界加入無綫電視，成為長壽綜藝節目《歡樂今宵》嘅台柱，唔少大型晚會司儀都由佢擔任。
杜平(右一)係《歡樂金宵》台柱

當年扁哥亦不時亦參演電視劇演出，經典嘅《家變》、《網中人》、《京華春夢》等都見到佢身影。直到1980年代初期，杜平自娛樂圈引退，同家人移居澳洲墨爾本，後來於當地開設餐館。

今年1月杜平亦自疫情後首次返港，再次設宴同一班圈中好友相聚，難得見到咁多好朋友，杜平都覺得好開心，佢仲話希望疫情快啲消失，佢就可以經常返香港見大家呀。
杜平1月返港時曾接受我哋《星光路上》專訪

當晚唔少賓客相識超過半個世紀，杜平都好珍惜大家嘅友情，尤其係當年同佢並肩作戰主持《歡樂今宵》嘅拍檔，講返起昔日嘅點滴，大家啲回憶都返晒嚟。
前年為慶祝同太太結婚60周年鑽石婚，杜平當時廣邀親朋好友到澳洲參加慶祝派對，筵開23圍；邀請超過200名賓客到場，大批香港演藝圈好友包括當年EYT拍檔修哥胡楓、蔡和平夫婦、森森、吳麗珠、鄧英敏、梁碧玲、溫兆倫及杜平契女翁虹，而大王安德尊專程向劇組請假飛抵當地道賀。