樂壇首張成績表派發 張敬軒奪三獎成大贏家

一個電台頒發樂壇首張成績表，表揚2024年表現出色嘅歌手，一向爭到頭崩額裂嘅男女歌手獎亦名花有主，勁爆男歌手金、銀、銅分別係林家謙、林奕匡、周殷廷，而勁爆女歌手金、銀、銅就由Gin Lee李幸倪、江海迦同泳兒奪得，而同時攞到勁爆年度專輯嘅林家謙以及勁爆歌曲嘅Gin Lee都話係一個好大嘅鼓勵。

林家謙、林奕匡同周殷廷瓜分男歌手三個獎項

Gin Lee獲女歌手金獎後心情大靚
橫掃勁爆年度歌手、勁爆年度歌曲及勁爆唱作人金獎三獎嘅張敬軒獨領風騷，軒公話今年自己將精力都投放喺演唱會上，所以今年只係出咗一首歌，希望明年再接再厲。
張敬軒就一人獨攬年度歌手、年度歌曲同唱作人金獎

而我哋TVB嘅一班歌手，亦喺頒獎禮上有唔少斬獲，好似姚焯菲同林智樂就分別奪得勁爆躍進女歌手金獎以及勁爆躍進男歌手金獎，而冼靖峰亦攞到勁爆躍進男歌手銅獎。鍾柔美、詹天文同埋黃奕斌就齊齊奪得勁爆Z世代樂勢力跳唱歌手金、銀、銅。
聲夢幾位成員呢日頒獎禮都各有斬獲

Chantel表示出席完頒獎禮後，仲有工作在身，所以未可以盡情慶祝住，但希望遲啲可以同聲夢一班好友相聚慶祝，而Windy亦都話好想放縱大飲大食，但都要等工作結束後先可以好好享受。

十大卓越歌手包括曾比特、周吉佩、張馳豪、魏浚笙、小塵埃、黃妍、鄧小巧、許廷鏗、陳柏宇、炎明熹。08年曾經攞過呢個頒獎禮新人獎嘅吉吉，相隔咁多年後再奪卓越歌手，佢都感觸良多，仲希望自己嘅努力，可以成為兩個小朋友嘅榜樣。
周吉佩成為今年十大卓越歌手之一

新人獎只係得一次機會角逐，所以一班得獎嘅新人都特別珍惜同興奮，好似羅啟豪話自己以呢個年紀入行，再有機會攞到新人獎，已經覺得係奇蹟，啟豪仲話未入行前，曾經好怕接觸咁多人，所以而家對佢嚟講，真係一個好大嘅轉變，嚟緊佢話完成年尾嘅工作後，都會好好同家人朋友一齊慶祝下。

羅啟豪非常感恩獲頒發新人獎而王嘉爾同韓國女歌手BiBi合唱歌曲《Feeling Lucky》就奪得勁爆播放指數歌曲大獎，由於Jaskson正於世界各地錄製第二張個人專輯，所以呢日未能出席領獎，但佢都有驚喜拍片分享得獎感受。