電影泉攻略丨2024港產片成績亮眼締造佳績 2025中外猛片搶先介紹丨EP136

新年快樂！今集《電影泉攻略》王鎮泉會帶大家總結過去一年香港同荷李活嘅成績表，以及展望2025年有咩值得期待嘅好作品。

2024年港產片繼續大豐收，好多電影都有亮眼嘅成績，好似《破。地獄》、《九龍城寨之圍城》、《爸爸》、《焚城》、《我談的那場戀愛》等，無論口碑同票房都有傑出表現，亦提升咗觀眾入戲院睇戲嘅意願。
2025年泉叔繼續同大家講電影。
而嚟到2025年，都有好多大家期待嘅港產片，好似有《怒火漫延》、《小朋友齊打交》、《虎獨不》、《驅魔龍族馬小玲》，當然仲有大家苦等八年，由麥浚龍執導，金城武、古天樂、劉青雲、梁家輝主演嘅《風林火山》，大家要好好期待一下啦！

除咗港產片之外，2025年荷里活都有好多猛片等住推出，Marvel方面就有《美國隊長：勇敢新世界》、《雷霆特攻隊》同《神奇4俠》排住隊上映；DC方面就重啟大作《超人》迎戰；至於Disney就會推出《白雪公主》、《史迪仔》真人版，以及動畫《優獸大都會 2》，再加埋《阿凡達3》、《BJ單身日記4》等等，鍾意睇戲嘅各位真係有福啦！

本週嘅新片速遞有《乒乓男孩》，小學生胡冠宇、黃軒熱衷乒乓球，夢想成為全世界最強雙打組合。隨住學校嚟咗新教練，高強度訓練令佢地突飛猛進。但自從一次雙打比賽失利，加上黃軒要轉校，二人產生誤會亦無奈分道揚鑣。一年後，二人喺國手選拔賽碰頭，知己知彼，邊個可以百戰百勝呢？
《鬼們之蝴蝶大廈》，陳薇帶住女兒為躲避家暴嘅丈夫入住有自殺勝地之稱嘅蝴蝶大廈後怪事頻傳。去到正值鬼門開嘅時候，蝴蝶大廈內意外頻傳，甚至發生好多靈異事件，但一眾住戶似乎已經習以為常。陳薇原本係想帶女兒逃離丈夫，點知竟然將自己捲入更大危機之中…

《破。鏡。慾》，指揮家兼未婚夫成鎮領導嘅管弦樂隊中嘅大提琴手秀妍，有一日突然消失，只留下一段錄影。成鎮因失去秀妍而悲痛欲絕，但對代替未婚妻嘅大提琴手美珠卻互相吸引住對方。然後喺一個雨夜，成鎮和美珠被彼此嘅慾望沖昏頭，喺秀妍屋企做出咗不可原諒嘅行為。

至於本週嘅票房龍虎榜，截至2025年一月二號中午為止，第三位係《獅子王：木法沙》；第二位係《破。地獄》；第一位係《誤判》。