VIVA搬入張敬軒舊屋同居 拆解宿舍慘變曱甴屋謎團

女團VIVA嘅真人騷節目不知不覺已經播到第五集喇！呢集講到Ada、Macy、VALC、Carina四人正式展開宿舍生活，搬入師兄張敬軒借出嘅「發跡屋」。不過四位女生入住後，就有一晚遇到最大挑戰──曱甴！
 女團 VIVA 終於入住張敬軒嘅發跡屋。
最初Ada突然喺廚房大叫嚇到面容扭曲，坐喺飯廳溫書嘅VALC反應淡然：「曱甴，係咪？」Ada說：「好大隻呀！」於是VALC就走入廚房同Ada商討「部署」。但由於曱甴喺鋅盤旁邊，兩位都唔敢靠近，最後要大叫有「昆蟲殺手」之稱嘅Macy幫手。原來「小強」並非第一次出沒，四位搬入去第一日已經有一隻「小小強」出現，當時就係由Macy負責處理。雖然Macy睇落好勇，但佢都話自己係有啲怕怕：「我驚㗎，不過佢唔識飛我就好啲，同埋平時啲昆蟲都係我搞掂。」
 遭到小強！
最後「廚房小強」由Ada鼓起勇氣用熱水淥死，VALC負責收拾「屍體」，但最好笑係當Ada將廚房碗碟重新洗一次時， Carina亦啱啱好返到屋企，喺Carina幫手期間， Ada「不經意」問：「你琴晚係咪喺梳化上面食嘢呀？你係咪食齋燒鵝吖？」 Carina忍笑問：「你又知嘅？你點解會知嘅？我整到好污糟咩？」二人隨即爆笑，Ada解答：「我今日就喺兩條唔同嘅罅位執到兩粒碎咗嘅齋燒鵝，哈哈。」
 Ada鼓起勇氣用熱水淥死小強。
雖然宿舍內出現幾次曱甴橫行情況，不過VIVA就唔認為係佢地整污糟所致，反而覺得係佢地掉垃圾度門有個縫隙，加上舊抽油煙機排氣管未有封口，所以曱甴先有機可乘，最後四人亦合力將門縫、抽油煙機排氣管及屋內所有渠口位封好。
 
呢集另一個看點，就係四個女仔第一次正式落煮，每人負責一個菜式。期間，Carina同VALC都要「請外援」，向家中外傭姐姐求救邊打視像電話邊煮；而Ada就手起刀落，表現得有板有眼；而Macy雖然一鼓作氣肉餅放入氣炸鍋烹調，但喺開餐時，一夾起肉餅先發現入面仍然係生豬肉，令Macy即刻大叫：「我可唔可以回爐重做呀？太厚啦……」場面十分搞笑！