流行都市丨梅小青被媽媽手問題困擾做手術 新一年繼續周遊列國弄孫為樂

金牌監製梅小青喺2020年以身體健康為由宣布退休，相隔多年呢日小青姐又重返TVB作客《流行都市》，跟醫生一齊探討媽媽手呢個都市病，小青姐見番相識多年嘅同事，份外有親切感。

已退休弄孫為樂嘅小青姐，呢日以嘉賓身份再次返娘家受訪
小青姐曾被媽媽手問題困擾，佢勸大家工作時勿忽略正確姿態，小青姐以前要撳遙控睇帶，一路睇一路改，小青姐話自己係咁撳遙控，出現五十肩（又稱肩周炎），以為只係吊起隻手做嘢先有問題，佢就將隻手放喺枱上撳遙控，點知情況繼續惡化。
同唔少女士一樣，小青姐都有「媽媽手」問題

小青姐話本來唔做嘢係想享受吓人生，點知呢兩年幾一直被痛症影響，後嚟佢決定開刀做手術；小青姐退休之後有更多時間陪伴家人，經常一家大細周遊列國，新一年繼續四圍去玩，盡情享受家庭樂，等一對孫「孖A」9月入小學，小青姐先再作打算。

與同為監製嘅家豪哥齊齊退休後，小青姐忙住旅行湊孫嘆世界