飛躍男女十強丨傅嘉莉恨攞獎賀40歲生日 戴祖儀為眾人安排獎項

《萬千星輝頒獎典禮2024》舉行在即，各個獎項嘅觀眾投票環節亦進入最後倒數，男、女飛躍進步獎嘅最後十強入圍者，呢日就亮相記者會為自己作最後拉票。
入圍「飛踴進步女藝員」常客 陳曉華Hera 同 戴祖儀，就話對得獎名單達成共識，Hera又分享自己當年選華姐時，係用Joey嘅一首歌嚟做表演，所以佢係特別欣賞對方嘅歌曲，而身旁嘅陳懿德就就指Hera係實至名歸，所以對方拎女飛躍嘅話大家都會心服口服。Joey更即場安排大家可以拎咩獎，但當點到一齊做訪問嘅陳楨怡時，佢就笑指對方要等下年，眾人即起哄，就話當晚陳楨怡可以拎最佳衣着獎。

一眾獲提名飛躍進步男、女藝員嘅藝人現身記者會拉票

今年女飛躍競爭似乎非常激烈
另一位入圍經驗豐富嘅 傅嘉莉Kelly ，就開到聲話恨攞獎嚟賀自己嘅40歲生日；關嘉敏則指日子越嚟越近，佢先開始有緊張嘅感覺，亦希望有機會可以上台拎獎。羅毓儀就指自己奪獎嘅信心偏低，指入圍十強兼可以參加呢個慶典，佢已經好開心喇。
近日喪貓嘅Kelly希望得獎紀念自己迎接40歲

孔德賢同鄭衍峰都已經係第4次提名「飛踴進步男藝員」，不過相比起奪獎，佢兩個就希望有多啲工作機會；而阮浩棕就自己已經入行11年，好多事都已經睇淡咗，所以都係以平常心去看待。
幾位男士都整裝現身，而大家都對提名各有睇法

十強入圍者中資歷最深嘅林景程，同連續兩年入圍嘅周吉佩，兩人對於攞獎都好謙虛，吉吉仲話自己目標擺喺「最佳電視歌曲」上，仲即場拉票叫支持佢嘅人都投喺《飛常日誌》呢首歌上，同時又指如果有機會嘅話都想演戲，而身旁嘅陳浚霆即刻開口叫吉吉加入《愛．回家》嘅大家庭，至於問到入行10年嘅陳浚霆對攞獎有冇信心？佢就話開心得到大家嘅肯定，不過就笑言自己似係去觀禮順道去旅行呀。

吉吉指自己對得到歌曲獎信心較大