日本殿堂級歌手中村雅俊親切派心心 考慮挑戰廣東歌望抽時間嘆香港美食

73歲日本殿堂級歌手中村雅俊當年演唱《前程錦繡》大受歡迎，羅文翻唱《前程錦繡》亦成為經典，中村雅俊今年出道50周年，即將到香港舉行演唱會，喺記招上講廣東話，中村雅俊應在場傳媒要求親切派心心，佢笑言冇諗過會做呢個動作。
中村雅俊來港出席記者會。
七、八十年代唔少歌手翻唱過中村雅俊嘅歌，中村雅俊亦考慮挑戰廣東歌，聽到在場記者提議佢邀廣東話版主唱當嘉賓一起合唱，中村雅俊讚呢個係一個好提議，同時佢都想有時間喺香港觀光嘆美食。
中村雅俊盼抽時間嘆香港美食。
中村雅俊回想42年前第一次到香港開騷，當時太太有同行，不過今次太太就唔會現身撐場，原來佢哋養咗隻小狗，出遠門就要送愛犬去動物醫院寄宿，太太好唔捨得，中村雅俊又指太太連家族旅行都選擇留喺屋企，叫中村雅俊同家人一齊去玩。