蕭正楠家中將有新成員感驚慌 吳若希為翠如拉票盼能四喜臨門

蕭正楠 吳若希 聯同一眾《奔跑吧！勇敢的女人們》嘅演員喺電視城出發，坐開蓬巴士四出宣傳，佢哋途經嘅地方，唔只係街上途人，就連大廈上嘅市民都相當雀躍同眾演員揮手打招呼，而阿蕭亦擺出心心手勢回應大家，落地後又親自派禮物同簽名影相，答謝大家支持。

《奔跑吧！》演員以花車巡遊鬧市宣傳
Jinny話以前大家都係以「越難越愛」嚟稱呼佢，但自劇集播出後，大家都改口叫佢做「林小姐」同「林采琳」，令佢大感意外，估唔到個角色咁入屋，Jinny又話好多觀眾都問佢劇情，最多嘅就係問佢幾時先發現劇中老公蕭正楠出軌，又話好想佢快啲黑化作出反擊。
有Fans以釆琳嘅污點廣告造型應援

蕭正楠近日就忙於同太太黃翠如執屋，佢仲自爆因為屋企將會多一位成員入住而驚惶失措，當大家都以為佢講嘅新成員係翠如肚入面嘅BB時，蕭正楠先知大家誤會，解釋指嚟緊將會有一位外傭姐姐入住，令原本一直以嚟都係過二人世界嘅佢哋，擔心唔知點同外傭姐姐相處。
即將任老竇嘅阿蕭，心情似乎越來越緊張

嚟緊19號就會舉行《萬千星輝頒獎典禮2024》，蕭正楠就話要睇下翠如當日嘅狀態先知對方會唔會一同到澳門出席，同時蕭正楠又感謝Jinny呢段時間一直為翠如拉票，Jinny就話如果頒獎典禮當晚，蕭正楠可以同太太黃翠如同埋BB一齊上台攞獎，成件事係相當開心，所以就出力幫翠如拉票呀。
阿蕭亦提到未知翠如會否出席周日嘅台慶頒獎禮

演出經驗豐富嘅鄧智堅，原來係第一次喺TVB嘅劇集中有感情線，不過佢話可惜係條單程路單戀賴慰玲，至於呢條單程路有冇結果，阿堅就話要睇嚟緊幾集賴慰玲嘅決定。而曾跟鄧智堅學謝嘅黃瀅仴，就指同對方喺同一套劇集中演出都有啲壓力，希望自己嘅表現喺對方眼中可以過關。

阿堅嘅單戀路會唔會有進展，佢呢日就大賣關子喇