泳兒新歌MV罕有分享與伴侶生活日常 親揀寵物演員：想揀隻識笑嘅狗

泳兒（Vincy）2025年第一炮作品《無糖可樂》正式上架，呢次佢唔再飾演其他角色，因為歌曲主角正正就係佢自己，泳兒一直甚少分享佢同伴侶嘅小日子，呢次歌曲及MV以情侶日常為題，更搵嚟情侶組合「小塵埃」合作，寫一首最純粹平實嘅愛情小品，讓大家感受細水長流嘅幸福。

泳兒呢次新歌MV搵嚟情侶組合「小塵埃」合作。
泳兒坦言自己並非sweet嘅人：「我係take action嘅人。譬如佢想我幫佢做啲乜，我會即刻做。我哋兩個都係怕羞嘅人，唔會攬攬，係會大家拍吓膊頭咁樣。」歌曲圍繞自己故事，泳兒再次邀請她黃偉文（Wyman）填詞，Wyman決定為佢寫一首關於愛情長跑慶祝紀念日嘅歌。最巧合係佢同Wyman分享自己愛情小故事當日，正正就係泳兒同男友拍拖周年紀念日！

泳兒一直甚少分享佢同伴侶嘅小日子，呢次歌曲及MV以情侶日常為題。
泳兒呢次擔任MV嘅creative consultant一職，「有份揀寵物演員，因為我想揀一隻識笑嘅狗，所以就揀咗『細細』。亦有份負責度故仔，尤其是某啲情節，希望比較貼地。例如有一part本身諗住寫字條俾對方，但我覺得現代人多數用電話，所以呢啲細節都會同導演Sheng溝通，點樣可以更貼近我嘅生活」，MV當中唔少情節係泳兒日常，佢最喜歡夜晚睇戲嗰part，因為簡簡單單喺屋企煲劇睇戲已經係一件平淡得來又幸福嘅事。」泳兒希望儲多啲經驗，以後可以有一部自己執導嘅MV。

泳兒呢次擔任MV嘅creative consultant一職，有份揀寵物演員。泳兒希望儲多啲經驗，以後可以有一部自己執導嘅MV。