獨家丨中1生100強搞新年聯歡會 周吉佩入場被圍逼爆水洩不通

《中年好聲音》嘅「中1生」感情極好，日前佢地趁新年搞咗一個聯歡會，就連好耐冇見嘅李思琳都有出席。而節目靈魂人物肥媽Maria Cordero、張佳添、導師韋綺珊、主持車婉婉都有現身。而當大家見到中聲1冠軍周吉佩時都興奮同佢影相打卡，將入場嘅路變得水洩不通，吉吉都好開心有呢個聚會令佢地呢班一百強選手再聚，傾下呢兩年嘅點滴。吉吉仲大讚大電視播住大家當年嘅比賽片段，而佢同何博文就交咗一百強賽時自己演唱嘅片段。
中1生 100強舉行聯歡會。
喺呢個咁特別嘅日子，顏志恒（Benson）就做學員代表，將自己特別設計，寓意每個人都可以獨當一面，發光發亮嘅徽章送俾評審同導師，感謝佢地嘅教導。
中1生 100強舉行聯歡會。
韋綺珊、肥媽、婉婉一路見證「中1生」嘅成長，呢日再回顧昔日點滴，都令佢地好感動。婉婉仲話「中1生」係佢嘅「第一胎」，就算唔記得曬大家嘅名，但佢地第一回合唱咩歌自己都好記得。
吉吉到場即同二家姐李思琳擁抱。
涂家堯作為今次活動搞手之一，除咗特別剪咗一條精華回顧片，更秘密貼心為大家訂製名牌，希望彼此都記得大家名字，家堯亦話希望大家無分你我可以玩返一晚。而魏嘉信就話，令佢感到最刺激係一齊睇精華回顧片，懷緬過去初參賽時嘅樣。支嚳儀同林珈徫就話自己睇返片覺得刺激之餘，都會諗當時嘅自己有冇揀錯歌。吳大強不但支持搞返個《中年好聲音再競選》節目，更大讚大家都好有進步，特別係我地嘅主播許文軒。
一眾中1生玩得相當開心。