古淖文香港個唱開鑼 獲周梁淑怡驚喜撐場

《中年好聲音2》冠軍 古淖文 ，上年喺澳門開騷獲得非常好嘅迴響，於是佢將呢個騷移師到香港一連兩晚演出，仲加入香港元素。一開場German就以《偷情》同《烈焰紅唇》向兩位已故樂壇巨星張國榮同梅艷芳致敬，喺台上爆發力十足嘅German，落力載歌載舞，全場氣氛High爆。

古淖文嘅兩場香港個唱演出氣氛非常熱烈
German喺台上重溫中聲2奪冠一刻，令全場都好感動，奪冠後雖然都有質疑嘅聲音，不過佢就以高EQ面對，佢喺台上風騷回應：「啲人話古淖文唔應該攞冠軍，好嘢！我攞咗啦！吹呀！哈哈哈⋯有時話古淖文個死人妖….有時又話輝智唔知咩⋯你吹呀，我同輝智好friend 。」
中聲嘅評審同導師亦都入場欣賞支持

呢晚演出除咗German父母、中聲評判張佳添、周國豐、導師韋綺姍，戰友陳俞霏以及German星光大道嘅幾位戰友都有來撐場，連周梁淑怡都係座上客，German都話好驚喜，仲話估唔到周太係佢粉絲。
周梁淑怡呢晚都有入場欣賞，令German非常驚喜

而German亦特登揀咗星光戰友陳蕾嘅《凡星》代表自己嘅心聲，為演唱會劃上完美句點。

German亦特別獻唱《亞洲星光大道》戰友陳蕾嘅歌曲《凡星》