鄧紫棋演唱會綵排傳不滿音響問題 疑爆粗鬧工作人員：離Ｘ晒大譜

鄧紫棋（G.E.M.）噚日被爆喺肇慶演唱會綵排時，疑不滿音響問題，片中傳出一把女聲質問現場音響工作人員，更一度罵爆工作人員「離x晒大譜」、「黐孖筋」，網民矛頭直指係G.E.M.爆粗！？

G.E.M.最近忙於喺內地巡唱，尾站喺肇慶舉行，網民日前喺社交平台分享一條疑似G.E.M.為演唱會綵排嘅疑似偷拍片，畫面就見G.E.M.喺台上綵排，身邊有一個保鑣為佢擔遮，其間聽到一把疑似G.E.M.嘅女聲喺台上拎住咪，鬧爆負責音響嘅工作人員，大罵冇Reverb（回音），該女聲續道：「呢度係完全冇？真係離X晒大譜，黐孖筋，你細少少人聲畀我……」

有網民力撐G.E.M.表示Reverb真係大，好奇明明未熄Reverb，點解工作人員話完全冇Reverb，另有網民覺得疑似G.E.M.講嘢嘅女聲態度惡劣，認為只係綵排一齊夾緊，毋須咁講嘢。