蔡一智晒剛到手樂悠咭 搭港鐵拍咭入閘有阻滯

啱啱喺1月3號踏入60歲嘅蔡一智，喺登六前後分別同圈中好友及家人舉行大大小小嘅生日派對慶生，開心迎接人生另一頁。
阿智晒出剛到手樂悠咭。
正式登六兩星期，阿智又有一個新身份，佢17號就喺社交平台晒出自己剛剛到手嘅樂悠咭，仲急不及待去搭港鐵享受2蚊搭車優惠。片中一身潮人打扮嘅阿智，先向鏡頭show 一 show自己張樂悠咭，然後就打算啪咭入閘，不過睇阿智平日應該揸開車多，搭港鐵嘅次數就有限，所以入閘時拍錯位，要同行嘅友人提醒先可以成功拍咭入閘，阿智喺帖文都自嘲寫道：「一睇就知是常客。」之後仲用hashtag標示「草蜢綠色更係旺架啦」、「一卡在手」、「綠油油」、「6oldwiththeflow」。
阿智入閘時拍錯位
唔少網民睇完阿智條片後，都指阿智根本唔似坐2蚊車嘅年紀，仲留言問點解冇職員欄佢話阿智用錯咭，亦有鬼馬嘅粉絲留言問：「有無send俾林海峰睇呀？」皆因早前林海峰同葛民輝曾高唱樂悠咭主題曲賀阿智生日。

雖然踏入60歲係人生另一篇章，但阿智不論外表及體態與真實年紀並不相符，除咗心境開朗之外，阿智亦著重生活作息，平日好勤力做Gym，又會同周潤發等一眾跑友跑步，持之以恆未有怠慢，身心狀態都越戰越勇。