StarTalk一氣呵成版｜蔡卓妍人生最高光時刻食天糊大癲 張繼聰片場放笑彈令演員難以招架

蔡卓妍 同 張繼聰 主演一套以賭為題材嘅賀歲片，兩人一齊接受樂新聞台主播 王鎮泉 嘅《StarTalk》專訪，分享拍攝期間爆笑趣事。
張繼聰 同 蔡卓妍 上嚟《StarTalk》分享拍賀歲片嘅趣事。
故事由阿聰對阿Sa一見鍾情，兩人閃婚後再互相了解對方，最憎人賭錢嘅阿聰遇上病態賭徒阿Sa而展開連串笑話。兩人雖然已經多次合作，但阿Sa對阿聰嘅搞笑仍未有抗體，仲話從未試過拍戲忍笑忍得咁辛苦，開心到每日都唔捨得收工。阿Sa形容喺片場唔單止爆肚咁簡單，應對大家嘅對白時會心跳加速，阿聰笑指每個角色都創造好多火花，大家都控制唔到。

阿Sa深刻記得其中一幕，阿聰加朱栢康嘅戲，兩人各自有成頁紙對白，但佢就要企埋一齊，事前阿Sa已經同導演提議唔需要加佢落去，但導演堅持，搞到阿Sa企喺兩人身邊時一路打自己一路叫自己唔好笑，好辛苦。
張繼聰成日喺片場搞到一眾演員忍唔住笑。
而另一場新婚床戲，角色交代阿聰以為幸福降臨可以同老婆親熱，自己同身體說話，搞到瞓喺床邊嘅阿Sa全程避開阿聰，面貼枕頭。阿聰又大爆飾演中韓混血兒嘅朱康搞笑一面，佢會突然間講講下對白講韓文，仲神似地有韓國人講英文嘅口音，加上佢嘅Oppa造型，搞到在場人人都忍唔住笑。而公認為最忍得笑嘅就係修哥胡楓，而且無論大家嘅對白點樣改，修哥都可以接得上，令阿聰同阿Sa衷心佩服。
阿Sa自稱牌章唔錯。
電影以打麻雀為題，阿Sa自稱牌章唔錯，因為5歲已經開始學打牌，雖然自己計數好差，但計番就好叻，喺拍攝期間謝安琪Kay嚟探班時大家仲玩番兩鋪。一講到打牌阿Sa就眉飛色舞，話食到靚糊時都會影相留念，好記得幾年前有記者問佢人生最高光時候係咩？阿Sa覺得對方應該想聽到喺紅館開騷之類答案，點知阿Sa嘅真心分享係食咗鋪天糊係人生最高光時刻，自己都大癲。

及後阿Sa同阿聰又分享過年習俗，阿Sa每年都會著新紅底過年，而阿聰就會買花、行花巿同入戲院睇賀歲片。兩人又接受小挑戰講拜年祝福語，阿聰滔滔不絕亦不敵阿Sa，因為佢連自己個名都串連埋落去，送上「SaSa滾，齊齊有錢搵。」給廣大巿民。