萬千星輝頒獎典禮｜張振朗龔嘉欣首封帝后 反黑英雄開心慶功 曾志偉指賽果反映民意

《萬千星輝頒獎典禮2024》於1月19號喺澳門上葡京綜合度假村舉行，所有獎項塵埃落定，《反黑英雄》奪最佳劇集、最佳男主角等成為全晚大贏家，出爐視帝張振朗連奪雙料視帝情緒激動，視后由《企業強人》嘅龔嘉欣，打敗強敵首奪視后。

張振朗榮封港馬雙料視帝、而龔嘉欣則首次封后
龔嘉欣拎住視后獎座感覺好夢幻，佢都好戥其他得獎嘅同事開心，坦言獎係唔容易拎，振朗亦直言拎咗第一個獎時，感覺自己唔會拎到視帝，疊埋心水睇表演，始終子溢同其他入圍嘅人都好強勁，直至頒視帝嗰陣，聽到自己名，振朗話心情好激動，哽咽忍唔住爆喊！

張曦雯憑《企業強人》奪得大馬視后，話之前好少去馬來西亞工作，好驚喜獲得大馬觀眾支持，而振朗好期待快啲同張曦雯一齊前往當地謝票，感謝大家嘅投票。
《企業強人》中扮演女強人嘅張曦雯成為大馬視后

馬國明憑《飛常日誌》奪得大灣區視帝，而《黑色月光》楊茜堯榮封大灣區視后，茜堯相隔12年再次喺台慶頒獎禮獲獎，茜堯有少少感觸，自己好耐冇拍公司劇，獲得咁多觀眾投票，話呢個獎對佢嚟講好有意義；大灣區視帝馬國明就話完全估唔到，皆因呢套劇係1月出街，已播出一年，佢話估唔到年尾仲有獎攞，馬明笑指太太湯洛雯都冇諗過佢有獎攞。
大灣區視帝視后則分別係馬國明同楊茜堯

林景程憑《反黑英雄》奪最佳男配角，打敗咗一眾強敵，佢淚謝天上母親，佢嘅得獎感言令全場動容，林景程受訪時表示好掛住媽咪，希望媽咪會滿意佢嘅表現，而傅嘉莉入行多年首奪女配獎。男、女飛躍進步獎就由大熱阮浩棕同陳曉華奪獎，阮浩棕感謝「上等嫲嫲」梁舜燕，遺憾未能聽到嫲嫲讚賞，陳曉華見到阮浩棕得獎時，佢喺台下都忍唔住喊，見到大家一齊攞獎好開心。
努力多年嘅林景程以《反黑英雄》演出獲頒最佳男配角

最佳女配角得主傅嘉莉一上台就泣不成聲

阮浩棕成為今屆飛躍進步男藝人得主

有唔少演出機會嘅陳曉華則獲頒飛躍進步女藝員

陳貝兒憑《無窮之路》系列第3次獲得最佳女主持，而最佳男主持就由區永權奪得，今年新增嘅男、女新人獎，就由張馳豪同陳懿德奪得，張馳豪話好似摱車邊攞到，呢個係一個好好開始，承諾之後會更加努力；姚焯菲喜獲劇集歌曲獎，話自己細到大睇《愛‧回家》，而家唱到主題曲係一個好神奇嘅體驗。

區爸區永權獲頒最佳男主持獎
今年新設男、女新人獎，張馳豪摘下首個獎項

負責頒獎禮主持嘅陳懿德將女新人獎收歸旗下

Chantel主唱嘅《愛．回定》主題曲為佢帶來劇集歌曲獎

今次最佳衣著獎係陳豪同王敏奕，不過獎項揭曉一刻，王敏奕就擺烏龍，令全場爆笑；今年專業精神獎頒畀TVB體育組，而體育組靈魂人物鍾志光獲得萬千光輝演藝大獎，最佳綜藝節目由《中年好聲音2》奪得、最佳資訊及專題節目由《東張西望》獲獎，今年多個獎項競爭激烈，曾志偉指賽果絕對公平公正，得獎名單反映民意，曾志偉親自到慶功宴恭喜得獎者，而《反黑英雄》團隊開心慶功，眾人構思反黑系列新題材。

連奪多獎嘅《反黑英雄》成為今屆大贏家