陳慧嫻相隔9年再踏紅館舞台 失平衡跌倒展現舞台智慧

陳慧嫻 相隔9年再踏紅館，舉行6場跨農曆年演唱會紀念出道40周年。1月21號晚頭場開鑼，唔少圈中朋友都有到場支持，好似李克勤、毛舜筠同老公、李蕙敏、周勵淇、鄧小巧、海兒、岑震軒、陳欣妍等；而黎明、學友、周慧敏、成龍等亦送上花籃祝賀。

陳慧嫻入行40周年演唱會開鑼
慧嫻喺一眾舞蹈員以巨型花瓣襯托下登場，仲連唱多首經典歌《奇妙旅程》、《不羈戀人》、《人生何處不相逢》。演唱會上發生咗一段小插曲，當慧嫻唱完《明日有明天》之後，就唔小心跌倒，幸好佢表現淡定，一招華麗轉身坐喺舞台，化解尷尬氣氛，音樂總監何秉舜亦即刻上前扶起佢，而慧嫻亦自嘲話：「都話咗唔好讚自己靚，一話靚即刻唔靚啦！」
雖然發生跌倒小插曲，不過完全未影響佢表現

雖然有小小意外，但絕對無影響慧嫻嘅表現，佢仲連氣唱出多首快歌《反叛》、《變、變、變變變》以及《貪貪貪》。頭場演出，慧嫻就請咗張敬軒做嘉賓，兩人除咗合唱一曲《跳舞街》之外，仲大放笑彈，慧嫻讚軒公係一個謙卑、好識照顧人嘅人，軒公即刻回應「我應該去院舍度工作」認真搞笑。

頭場仲有張敬軒擔任嘉賓