楊茜堯講羅子溢穿搭變有味笑話 讚老公「Part Part都得」眾人笑成一團

《萬千星輝頒獎典禮2024》雖然結果塵埃落定，喺緊張氣氛下其實有唔少趣事發生！日前TVB娛樂新聞台主播王鎮泉就喺社交平台上傳一段訪問羅子溢、楊茜堯、高海寧及馬國明嘅片段，笑指「呢段訪問真係黐咗線」，等網民一齊回味呢段搞笑對話。 

日前TVB娛樂新聞台主播王鎮泉就喺社交平台上傳一段訪問羅子溢、楊茜堯、高海寧及馬國明嘅片段。

片中可見泉叔問子溢同茜堯有冇為對方揀戰衣，一開始茜堯就話：「冇，我唔過問佢，佢亦都唔過問我。」馬明同高Ling就讚茜堯同子溢所揀嘅顏色好襯，點知子溢就回一句：「其實佢擺喺你隔離都ok襯㗎！」子溢仲話茜堯只要同馬明企埋一齊，《On Call 36小時》CP感出晒嚟！ 泉叔再問茜堯會唔會限制老公V領開曬肌，呢條問題就令成個訪問越走越歪，最後令眾人大爆笑。事關茜堯好大方話「想𠝹開子溢個領口」，馬明就話：「其實佢（子溢）唔使著裡面嗰件。」茜堯立刻護夫，笑言子溢而家唔可以咁喇。當茜堯聽到泉叔問：「係咪上面下面都得？」茜堯就好自然回答：「上面好得，下面我成日都提佢。」

片中可見泉叔問子溢同茜堯有冇為對方揀戰衣，茜堯竟然話子溢「上面好得，下面我成日都提佢」。
子溢聞言忍唔住笑言要老婆講清楚，眾人心領神會笑成一團，連高Ling都笑到面紅紅，茜堯更同馬明講：「我唔係話條褲以下。」令馬明隨即變樹熊驚訝樣解釋：「我冇話條褲以下，我冇講過。我係話係件衫唔使著，唔係條褲唔使著。」最後茜堯被「上面、下面」呢個話題搞到笑唔停口，仲賣口乖話老公「Part Part都得」。

子溢聞言忍唔住笑言要老婆講清楚，眾人心領神會笑成一團。