馬國明同高海寧拍親熱戲唔使備案 文佐匡講緋聞：唔一定要女仔

馬國明同高海寧呢對CP首次合作拍攝賀歲片，呢日佢哋就聯同監製王晶、導演葉念琛、許紹雄、蔡潔、陳家樂、陳靜、林盛斌、郭珮文及 Sean文佐匡 等演員，以及演唱主題曲嘅尹光齊齊現身首映，而湯洛雯亦有現身撐老公馬國明新片。
眾演員出席新片首映。
拍戲難免會有親密動作，馬國明就話老婆湯洛雯落過柯打，指如果要同女演員拍親熱戲要同佢講，但如果個對手係高ling嘅話就唔使報備，因為靚湯相當放心佢同高ling呀。講到高ling係靚湯陣營嘅人，平時會幫手𥄫實馬明，對此高ling就話馬明係個好自覺好乖嘅人，根本就唔使人𥄫住呀。
湯洛雯都有嚟撐老公馬國明新片首映。
馬明早前喺《萬千星輝頒獎典禮2024》中奪得大灣區最喜愛TVB男主角，不過由於佢要為新劇《夫妻的博弈》開工，所以仲未有時間同靚湯食飯慶祝。提到當晚賽果引起熱議，高ling就話自己都戥大家開心，好似張振朗咁一次奪得兩個視帝，仲有張曦雯同楊茜堯，都非常戥佢哋開心，至於講到有網民指賽果係爆冷，高ling就話呢啲見人見智喇。
高海寧麻雀女王02.jpg
講到今個農曆新年嘅行程，馬明同高ling都話主力會為電影宣傳同謝票，不過都會約親友食飯拜年，高ling仲話約好成班人去馬明屋企拜年打麻將，最重要嘅係𢭃對方封利是呀。
蔡潔許紹雄
蔡潔今次喺戲中同許紹雄飾夫妻，佢笑言自己等咗呢個機會好耐，終於都畀佢得到手喇，同時亦期望可以有機會再同對方喺劇集中再合作，而許紹雄就話好榮幸有個咁靚嘅太太呀。

文佐匡

首次拍電影嘅Sean，就話劇組對佢呢位新人相當照顧，講到近日有傳佢同Windy詹天文拍拖，Sean就表現得相當驚訝，除咗亦指有報道傳Windy同其他人拍拖外，更指自己配不上對方，至於問到擇偶條件，Sean就話性格最重要，溫柔得意Nice就最好，不過當傳媒講到Windy嘅條件都好合適時，Sean即刻笑住話：「但係唔一定要女仔㗎嘛！」即時令在場眾人哄堂大笑。