張馳豪獲最佳男新人壓力倍增 冼靖峰空運吞拿魚賀好兄弟轉字頭

張馳豪 冼靖峰 黃劍文 同 黃洛妍 幾位唱將齊集商場為大家送上靚歌，預早同大家迎接蛇年。Aska去年成績唔錯，仲喺萬千星輝頒獎典禮2024度攞到最佳男新人獎，得到大家認同，Aska開心嘅同時，壓力都倍增，佢坦言話自己同大家對佢嘅期望都多咗，不過佢會視壓力為動力繼續努力。

Aska台慶頒獎禮得新人獎後，雖然開心同時備感壓力
雖然三月先到Aska 30歲生日，但作為好兄弟既Archie就話已經計劃好點同Aska慶生，佢準備由日本訂購一條原型嘅巨型吞拿魚空運抵港﹐再請廚師現切魚生品嚐。對於Archie呢個30人份嘅魚生派對，Aska大感愕然，不過Archie就相當放心一定邀請到咁多朋友一齊慶祝Aska轉字頭。
Archie已經諗定盛大方式為Aska慶祝生日

嚟緊就到農曆新年，Kimman就將會出埠度歲，過往曾經連續7年去滑雪。因為疫情同參加《中年好聲音2》打斷呢個滑雪嘅習慣﹐呢個假期終於可以重拾興趣。

Kimman會出埠重拾滑雪嘅樂趣

相反Janees就自認係工作狂仲話越多工作越好，而講到早前佢有機會喺《聲生不息‧大灣區季》節目中同薛凱琪同埋衛蘭一齊合唱，佢都覺得好難得。因為從小喺K房都係唱兩位歌手嘅歌曲，可以親耳聽到衛蘭讚佢把聲好靚，令佢更加驚喜。

Janees早前錄影《聲生不息》仲有機會同衛蘭、薛凱琪合唱