梁浩賢獲顏米羔吻賀44歲生日 眾中2生獻聲勾起粉絲回憶殺

梁浩賢HY今個月31號就會踏入44歲生日，由於正日撞正大初三，所以浩賢提早喺年廿五同一眾「涼粉」舉行生日派對，呢日咁啱仲係佢嘅舊曆生日。
梁浩賢提早同涼粉慶祝生日。
中2生嘅兄弟姊妹 譚輝智 古淖文 顏米羔 龍導 尹新杰及 女團MISSY 兩位成員 陳俞霏 陳譽文都有到場祝賀，顏米羔更為對方獻吻以示祝賀。而壽星仔浩賢喺生日派對上就即興同尹新杰合唱返當時喺《中年好聲音2》比賽時嘅出賽歌曲〈領悟〉，之後霏霏、譽文同米羔亦相繼獻聲，勾起大家滿滿嘅回憶。
一眾中2生都有嚟祝賀浩賢。一眾中2生都有嚟祝賀浩賢。
一眾「涼粉」為咗呢次生日會，除咗訂制咗浩賢嘅卡通人型立牌嚟畀大家打卡外，仲製作咗精美嘅入場卷同年曆卡送畀到場嘅賓客，而現場亦有浩賢唔同時期嘅照片同刻有佢名嘅籃球，當然仲有字母 H 同 Y 嘅大蛋糕為浩賢慶祝。
顏米羔吻賀壽星仔。
講到2025年嘅新動向，浩賢就表示希望今年可以推出新歌，另外亦會有更多新嘗試同工作，包括將有機會出演舞台劇。
浩賢希望今年可以出新歌。